Кыргыз Республикасынын Министрлер Кабинетине караштуу Интеллектуалдык менчик жана инновациялар боюнча мамлекеттик агенттиктин демилгеси менен Жогорку билим берүүнү модернизациялоо жана Жусуп Баласагын атындагы Кыргыз улуттук университетинин базасында бирдиктүү илимий-изилдөө университетин түзүү демилгеси көтөрүлдү.

Кыргыз Республикасынын Президентинин “Билим берүү чөйрөсүндөгү айрым маселелер жөнүндө” Жарлыгынын долбооруна шилтеме-негиздемеге ылайык, Нарын, Талас жана Баткен мамлекеттик университеттерин Ж.Баласагын атындагы КУУга бириктирүү жолу менен кайра түзүү каралууда. Мындай консолидация кадрларды даярдоонун сапатын жогорулатууга, аймактардын илимий потенциалын өнүктүрүүгө жана өлкөнүн бирдиктүү билим берүү мейкиндигин түзүүгө багытталган.

Демилгенин максаты – жогорку квалификациялуу адистерди даярдоонун флагманы, алдыңкы билимдерди жана технологияларды жаратуучу, аймактарды социалдык-экономикалык өнүктүрүүнүн куралы боло турган заманбап изилдөө университетин түзүү.

Бүгүнкү күндө 35 000ден ашуун студент жогорку окуу жайларында жогорку билим берүү программалары боюнча жана 16 000ден ашуун орто кесиптик билим берүү программалары боюнча билим алууда. Келечектеги университет артыкчылыктуу тармактарга: агроөнөр жай, суу ресурстарын башкаруу, энергетика, экология, педагогика, химия, биология, укук жана экономикага басым жасайт деп болжолдонууда.

Бириктирүүнүн алкагында төмөнкүлөр ишке ашырылат:

• санариптик башкаруу чечимдери,
• заманбап илимий лабораториялар,
• академиялык мобилдүүлүк программалары,
• аймактарда максаттуу стажировка программалары,
• бизнес жана эл аралык структуралар менен өнөктөштүк.

Алдыңкы өлкөлөрдүн (Улуу Британия, Израил, Канада, Россия) тажрыйбасы көрсөткөндөй, университеттердин консолидациясы илимий жана билим берүүнүн атаандаштыкка жөндөмдүүлүгүнүн өсүшүнө өбөлгө түзөт. Келечекте 5-10 жылдын ичинде бириккен университет Борбор Азияда алдыңкы орундарды ээлеп, 10-15 жылдан кийин эл аралык рейтингдер боюнча дүйнөнүн эң мыкты 1000 университетинин катарына кире алат.

Мамлекеттик агенттик күчтүү, заманбап, аймактык интеграцияланган университетти түзүү таланттуу жаштардын аймактарга туруктуу агымын камсыз кылып, борборго жана чет өлкөлөргө кадрлардын агылышын азайтып, Кыргызстандын инновациялык өнүгүүсүнүн кыймылдаткычтарынын бири болоорун баса белгилейт.