Кыргыз Республикасынын Тышкы иштер министрлиги Америка Кошмо Штаттарына кирүү үчүн F, M жана J категорияларындагы иммиграциялык эмес визаларга (студенттер жана алмашуу программалары) кайрылууну пландап жаткан жарандарга америкалык тарап киргизген жаңы талаптар жөнүндө маалымдайт.

АКШнын Мамлекеттик департаментинин расмий билдирүүсүнө ылайык, америкалык тарап F, M жана J категорияларындагы иммиграциялык эмес визаларга (студенттер жана алмашуу программалары) талапкерлер үчүн кеңейтилген текшерүү процедураларын киргизүүдө.

2025-жылдын 18-июнунан тартып, бул визаларды алуу үчүн бардык талапкерлер социалдык медиа аккаунттарынын купуялык жөндөөлөрүн "жалпыга ачык" кылып өзгөртүүгө милдеттүү. Бул талап арыз ээсин жакшыраак аныктоого жана АКШнын иммиграция мыйзамына ылайык, алардын Кошмо Штаттарга кирүүсүн текшерүүгө багытталган.

Бул эреже F, M жана J категорияларындагы иммигрант эмес талапкерлерге тиешелүү жана АКШнын консулдук органдары жүргүзгөн милдеттүү түрдө визаны текшерүү процессинин бир бөлүгү болуп саналат.

Талапкерлерге төмөнкү шилтемеден студенттик визага арыз берүү процессине байланыштуу расмий маалыматты кылдаттык менен окуп чыгуу сунушталат:

https://www.state.gov/releases/office-of-the-spokesperson/2025/06/announcement-of-expanded-screening-and-vetting-for-visa-applicants/

https://ais.usvisa-info.com/ru-kg/niv/information/announcements

Биз буга чейин студенттик виза алган жарандардын көңүлүн визалык режимдин шарттарын так сактоо жана бүткүл болуу мөөнөтүнүн ичинде укуктук статусун сактоо зарылдыгына бурабыз.

Окуу жайынан чыгарылганда, студенттик статусун жоготкондо же окуусун токтоткондо, бул тууралуу маалымат америкалык тарап тарабынан автоматтык түрдө катталат, бул визаны жокко чыгарууга, статусун узартуудан баш тартууга жана башка юридикалык кесепеттерге алып келиши мүмкүн.