Москва өкмөтүнүн колдоосу менен ишке ашырылып жаткан жаштар алмашуу программасынын алкагында Москва шаарындагы азиз балдарды тарбиялоо жана реабилитациялоо боюнча No1 мектеп-интернатынын делегациясы Ош шаарына барды. Делегациянын курамында 10 студент, мекеменин директору Иван Вишневецкий жана окутуучу-насаатчылар бар.

Ош шаарындагы азиз жана начар көрүүчү балдар үчүн атайын жалпы билим берүүчү мектеп-интернатында орусиялык мектеп окуучулары эки күн болушту. Иш сапардын программасына мастер-класстар, педагогикалык тажрыйба алмашуу, Кыргызстанда колдонулуп жаткан билим берүү технологиялары менен таанышуу кирген.

Ош шаарындагы адистештирилген окуу жайдын директору Айгүл Кудайкулова бул иш сапар эки мекеменин ийгиликтүү кызматташтыгынын логикалык уландысы болгонун белгиледи. 2025-жылдын жаз айларында Ош шаарындагы мектептин окуучулары Москвада өткөн Бүткүл россиялык «Чыгармачылыктын канатында» сынагында Гран-приге ээ болушкан.

Иш сапардын жүрүшүндө кыргызстандык мугалимдер кесиптештерине көрүүсү начар балдар менен иштөө ыкмалары, анын ичинде россиялык «Лампада» фонду тарабынан берилген интерактивдүү панелдерди жана заманбап жабдууларды колдонуу менен тааныштырышты.

Оштогу Орус үйүнүн башчысы Дмитрий Аврам мындай пикир алмашуунун маанилүүлүгүн баса белгиледи:
"Орусия менен Кыргызстандын билим берүү мекемелеринин кызматташуусу инклюзивдик билим берүүнү жайылтууга өбөлгө түзөт. Ош шаарындагы Орус үйү кесиптик жана гуманитардык байланыштарды чыңдоого багытталган демилгелерди ар дайым колдоп келет".

Маданий программанын алкагында Орусиядан келген коноктор Сулайман-Тоо музей комплексине, Көркөм өнөр музейине, Г.Айтиев атындагы көркөм сүрөт мектебине жана Санжыра этнокомплексине барышты.

Делегациянын маршруту боюнча кийинки аялдамасы Бишкек болот, анда мектеп окуучулары ушундай мектеп-интернаттын иши менен таанышып, борбор калаанын кооз жерлерине жана Ала-Арча улуттук паркына барышат.