Қозоғистон Республикаси Бош вазирининг ўринбосари — ташқи ишлар вазири Мурат Нуртлеу Таиландга ташрифи чоғида мамлакатнинг йирик компаниялари раҳбарлари билан музокаралар ўтказди.

M. Нуртлеу “Really Cool Airlines” президенти Пати Сарасин билан Қозоғистон ва Таиланднинг йирик шаҳарлари ўртасида тўғридан-тўғри рейсларнинг очилишини муҳокама қилди. Ушбу қадам визасиз режим шартномаси имзолангандан кейин мамлакатлар ўртасидаги муносабатларни ривожлантиришнинг мантиқий давоми бўлади.

Қозоғистон Ташқи ишлар вазири, шунингдек, “Thai President Foods” компанияси раҳбари Поджана Паниангвайт билан озиқ-овқат саноати соҳасида ҳамкорлик қилиш имкониятларини кўриб чиқди. Қозоғистон ушбу компанияни ўз маҳсулотларини мамлакат ички бозорига ҳам, Марказий Осиё ва ЕОИИ га ҳам етказиб бериш бўйича минтақавий логистика маркази деб билади. Томонлар Қозоғистонда завод очиш истиқболларини ҳам муҳокама қилдилар.

“Sea Value” компанияси раҳбари Чанинтра Чалисарапонг билан учрашувда Таиланд томонининг Қозоғистон ва Марказий Осиёнинг бошқа мамлакатларига денгиз маҳсулотларини етказиб бериш бўйича савдо ва тарқатиш марказини яратиш учун Қозоғистон бозорига сармоя киритиш ниятлари муҳокама қилинди.