Апрель айынын аягында Улуттар сарайында Тажикстан Республикасынын Президенти Эмомали Рахмон менен Европа реконструкциялоо жана өнүктүрүү банкынын президенти Одил Рено-Бассо айымдын жолугушуусу болуп өттү. Тараптар Тажикстандын экономикасынын жана социалдык турмушунун ар кыл тармактарында ЕРӨБ тарабынан каржыланган түрдүү долбоорлорду ишке ашырууну талкуулашты.

Президент Э.Рахмон банктын жетекчилигине узак мөөнөттүү жемиштүү кызматташуусу үчүн ыраазычылык билдирип, алардын өлкөнү өнүктүрүү үчүн жасаган ишинин маанилүүлүгүн моюнга алды. Мамлекет башчысы кызматташтыктын азыркы татыктуу деңгээлин баса белгилеп, ЕРӨБ менен кызматташуу аркылуу Тажикстандын өнүгүүсүнүн жогорку максаттарына жетүүгө үмүттөнөрүн билдирди.

Жолугушуунун катышуучулары ошондой эле тышкы факторлордун Тажикстандын экономикасына тийгизген терс таасирин талкуулашты, тараптар инвестицияны көбүрөөк тартуу жана реформаларды улантуу зарылчылыгы тууралуу бир пикирге келишти. Сүйлөшүүлөрдүн катышуучуларынын айтымында, реформаларды колдоо үчүн гранттарды жана жеңилдетилген каражаттарды бөлүү республиканын туруктуу социалдык-экономикалык өнүгүүсүнүн ачкычы болот.

Жолугушууда өнөр жай, айыл чарба, тоо-кен, шаар инфраструктурасы, экономиканы санариптештирүү сыяктуу түрдүү тармактардагы кызматташуулар да талкууланды. “Жашыл” технологияларды киргизүү, билим берүү жана эмгек миграциясы маселелери талкууланды.

Сүрөт: Тажикстан Республикасынын Президентинин расмий сайты