Душанбе, 11 апрел, – АИ «Корвон Иттилоот». Дар пасманзари мураккабшавии вазъи амниятӣ дар минтақа, 10 аперл Эмомали Рахмон Президенти Ҷумҳурии Тоҷикистон мулоқот бо Дабири кулли нави Созмони Аҳдномаи Амнияти Дастаҷамъӣ (СААД) Таалатбек Масадыков баргузор намуда, самтҳои калидии ҳамкориро дар бахши амнияти дастаҷамъӣ мушаххас кард.
Сафари кории роҳбари Котиботи СААД ба Душанбе танҳо як мулоқоти протоколӣ набуда, балки марҳилаи бознигарии вазифаҳои асосии Созмон дар шароити тағйирёбии таҳдидҳо ба шумор меравад. Дар оғози суҳбат Сарвари давлат Таалатбек Масадыковро ба муносибати оғози фаъолияташ дар мақоми нав табрик гуфта, ба зарурати натиҷагирии амалӣ ишора намуд.
Зимни музокирот тарафҳо вазъи кунунии минтақаи масъулияти СААД ва атрофи онро баррасӣ намуда, ҳамчунин доираи васеи масъалаҳои минтақавӣ ва байналмилалиро мавриди муҳокима қарор доданд, ки ба суботи Осиёи Марказӣ таъсири мустақим мерасонанд.
Таваҷҷуҳи махсус ба таҳкими ҳамоҳангсозӣ ва баланд бардоштани самаранокии вокуниш ба таҳдидҳои муосир равона гардид. Дар ин замина, Президенти Тоҷикистон аҳамияти татбиқи ҳамаҷонибаи қарорҳои Шӯрои амнияти дастаҷамъии СААД-ро таъкид кард.
Дар асл, сухан дар бораи гузариш аз изҳороти сиёсӣ ба амалҳои мушаххас меравад — равандие, ки барои кишварҳои узв дар шароити афзоиши хатарҳо аҳамияти ҳалкунанда пайдо мекунад.
Мулоқоти Душанбе тамоюли густариши нақши механизмҳои бисёрҷонибаи амниятиро инъикос мекунад. Барои Тоҷикистон, ки бо минтақаҳои ноором ҳаммарз аст, масъалаи самаранокии СААД дорои хусусияти амалӣ мебошад.
Таъйини Дабири кулли нав ва мулоқотҳои аввали ӯ бо роҳбарони кишварҳои узв ба шаклгирии стратегияи минбаъдаи Созмон замина мегузоранд. Дар ин раванд, Тоҷикистон ҳамчун иштирокчии фаъол дар ташаккули рӯзномаи амниятӣ баромад мекунад.
Паёми асосӣ равшан аст: дар шароити таҳдидҳои афзоянда, амният дигар танҳо мавзӯи изҳорот нест. СААД бояд қобилияти худро дар амал исбот намояд, дар ҳоле ки кишварҳои узв бояд ҳамкории худро ба сатҳи нави ҳамоҳангсозии воқеӣ бардоранд.
Аз ҳамин вобаста аст на танҳо суботи минтақа, балки эътимод ба худи низоми амнияти дастаҷамъӣ.
Акс: Хадамоти Матбуоти Президенти Ҷумҳурии Тоҷикистон
