Душанбе, 10 январ, – АИ «Корвон Иттилоот». Сохтмони яке аз иншооти муҳими инфрасохтории Вилояти Мухтори Кӯҳистони Бадахшон — қитъаи роҳи автомобилгарди Калаи-Хумб – Вандж (то сарҳади ноҳияи Рӯшон) — аллакай моҳи дуюм аст, ки муваққатан боздошта шудааст.

Тавре дар Вазорати нақлиёти Ҷумҳурии Тоҷикистон ба «Азия-Плюс» иттилоъ доданд, идомаи корҳои сохтмонӣ пас аз барқарор гардидани амнияти пурра дар марзи Тоҷикистону Афғонистон имконпазир хоҳад буд.

Дар вазорат таъкид менамоянд, ки ин қарор сирф аз рӯи зарурати таъмини амнияти мутахассисони хориҷӣ қабул шудааст.

Сабаби боздошти сохтмон ҳамлаи мусаллаҳона аз 30 ноябри соли 2025 дар деҳаи Шодаки ноҳияи Дарвоз мебошад. Тибқи маълумоти расмӣ, гурӯҳе аз шаҳрвандони Афғонистон аз деҳаи Рузваяки вилояти Бадахшони Афғонистон вориди қаламрави Тоҷикистон шуда, ба кормандони ширкати пудратчӣ ҳамла кардааст.

Ҳадафи ҳамла кормандони ширкати чинии China Road and Bridge Corporation (CRBC) буданд, ки аз моҳи сентябри соли 2022 ба сохтмони қитъаи мазкур машғул мебошанд.

Ба иттилои маркази матбуоти Қӯшунҳои сарҳадии КДАМ Ҷумҳурии Тоҷикистон, дар натиҷаи ҳамла ду шаҳрванди Чин ба ҳалокат расида, ду нафари дигар захмӣ шудаанд.

Дар Вазорати корҳои хориҷӣ таъкид намуданд, ки маҳз бо назардошти ин ҳодисаи фоҷиабор ва бо дастури сафорати Чин дар Тоҷикистон корҳои сохтмонӣ аз 1 декабри соли 2025 муваққатан боздошта шуданд. Ҳамзамон дар Вазорати нақлиёт зикр карданд, ки коргарони маҳаллӣ корҳои барқарорсозии роҳро идома медиҳанд.

Ба иттилои Вазорати нақлиёт, қитъаи Калаи-Хумб – Вандж, ки аз қаторкӯҳҳои ноҳияи Дарвоз мегузарад, яке аз мушкилтарин қитъаҳои роҳ дар кишвар ба ҳисоб меравад ва солҳои тӯлонӣ таъмири асосӣ нашуда буд.

Пас аз анҷоми пурраи таҷдид ва навсозӣ, аз ҷумла сохтмони ду нақб бо дарозии умумии 5,2 километр, интизор меравад:

• масофаи роҳ 16,7 км кӯтоҳ гардад;
• дарозии умумии қитъа аз 109 км то 92,3 км коҳиш ёбад;
• аз ин ҳисоб 53 км дар ҳудуди ноҳияи Дарвоз ва 39,3 км дар ҳудуди Вандж ҷойгир мешавад.

Ҳадафи асосии лоиҳа — баланд бардоштани сатҳи амният, таъмини ҳаракати бемамониати нақлиёт дар тамоми фаслҳои сол ва мутобиқ гардондани роҳ ба меъёрҳои байналмилалӣ мебошад.

Барои таҷдиди ин қитъа Ҳукумати Ҷумҳурии Мардумии Чин 230 миллион доллари ИМА маблағгузории бебозгашт ҷудо кардааст.

Дар дурнамо, пас аз анҷоми пурраи корҳои таҷдид, роҳи автомобилгарди Душанбе – Кулма бояд ба долони байналмилалии мултимодалӣ табдил ёбад, ки аҳамияти иқтисодии хеле калон барои ҷумҳурӣ дорад.

Сохтмон 20 сентябри соли 2022 оғоз ёфта, тибқи шартнома бояд 20 сентябри соли 2026 анҷом ёбад.

Роҳ мувофиқи меъёрҳои дараҷаи III тарҳрезӣ шудааст ва аз ду хатти ҳаракат бо паҳнои умумии 12 метр иборат мебошад.

То имрӯз:

• корҳои асосӣ дар ҳарду нақб анҷом ёфтаанд;
• аз 14 пул 12 пурра сохта шудаанд;
• корҳои асфалтпӯшӣ дар қисми зиёди роҳ иҷро гардидаанд.

АКС: Азия плюс