Душанбе, 19 декабр, 2025 – АИ «Корвон Иттилоот». Дар Тоҷикистон метавонад Фонди кафолати қарзҳо таъсис дода шавад — абзори нави молиявие, ки ба беҳтар намудани дастрасии соҳибкорони истеҳсолӣ ба қарзҳои дарозмуддат ва арзон равона мегардад. Пешниҳоди мазкурро Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон дар ҷараёни Паём ба Маҷлиси Олии кишвар ироа намуданд.

Сарвари давлат таъкид карданд, ки дар даҳ соли охир ҳаҷми умумии қарзҳои додашуда 143 миллиард сомониро ташкил додааст, аммо танҳо 38 фоиз-и он ба соҳибкории истеҳсолӣ рост меояд.

Ба гуфтаи Президент, чунин нишондиҳанда барои рушди устувори иқтисодӣ ва тақвияти иқтидори истеҳсолии кишвар кофӣ нест.

Дар ин замина Пешвои миллат ба Бонки миллии Тоҷикистон ва ташкилотҳои қарзӣ супориш доданд, ки барои ҷалби бештари сармояи хориҷӣ, инчунин пасандозҳои шахсони воқеӣ ва ҳуқуқӣ ба низоми бонкӣ тадбирҳои иловагӣ андешанд.

Таъкид гардид, ки пешниҳоди қарзҳо бояд пеш аз ҳама ба соҳаҳои афзалиятноки иқтисод, бахусус соҳибкории истеҳсолӣ, равона карда шавад. Бо мақсади коҳиш додани хатарҳои бонкӣ ва васеъ намудани дастрасӣ ба маблағгузорӣ Пешвои миллат таъсиси Фонди кафолати қарзҳоро пешниҳод намуданд.

Дар баробари ин, барои беҳтар намудани шароити иҷтимоии аҳолӣ ва фароҳам овардани имкониятҳои васеъ барои дастрасӣ ба манзил, Президенти Ҷумҳурии Тоҷикистон тавсия доданд, ки механизмҳои рушди бозори қарзҳои ипотекӣ такмил дода шаванд.

Ин тадбирҳо ба афзоиши ҳаҷми қарзҳои ипотекӣ барои аҳолӣ равона гардида, ҳамзамон ба рушди соҳаи сохтмон ва бахшҳои вобаста мусоидат хоҳанд кард.

Иқдомҳои пешниҳодшуда — таъсиси Фонди кафолати қарзҳо ва густариши қарздиҳии ипотекӣ — ҷузъи сиёсати фарогири давлат дар самти дастгирии бахши воқеии иқтисод, баланд бардоштани сатҳи зиндагии мардум ва ташаккули низоми устувори молиявӣ мебошанд.

Бо ин роҳ, Тоҷикистон ба сӯи сифати нави рушди иқтисодӣ ҳаракат мекунад, ки дар он истеҳсолот ва эҳтиёҷоти иҷтимоии шаҳрвандон дар маркази таваҷҷуҳ қарор доранд.

АКС: АИ «Корвон Иттилоот»