Душанбе, 13 феврал, – АИ «Корвон Иттилоот». Ба ифтихори 12 феврал — Рӯзи байналмилалии мубориза бо терроризми хушунатомез — бо ибтикори волонтёрони назди Бахши кор бо ҷавонон ва варзиши ноҳия акцияи тарғиботӣ таҳти унвони «Мо ҷавонон амалҳои террористиро маҳкум менамоем» баргузор гардид.

Ҳадафи асосии чорабинӣ баланд бардоштани сатҳи маърифати ҳуқуқӣ ва сиёсӣ миёни ҷавонон, таҳкими ҳисси масъулиятшиносӣ ва ташаккули мавқеи устувори шаҳрвандӣ нисбат ба зуҳуроти номатлуб, аз ҷумла терроризм ва ифротгароӣ, арзёбӣ гардид.

Дар доираи акция волонтёрон бо шиору овезаҳо ва варақаҳои иттилоотӣ миёни сокинон, махсусан ҷавонон, корҳои фаҳмондадиҳӣ анҷом доданд. Иштирокчиён таъкид намуданд, ки терроризм ва хушунат ба арзишҳои инсонӣ, сулҳу субот ва пешрафти ҷомеа мухолиф буда, ҷавонон бояд дар мубориза бар зидди чунин падидаҳои хатарнок мавқеи фаъол дошта бошанд.

Зимни баромадҳо масъулони бахш иброз доштанд, ки пешгирии гаравидани ҷавонон ба гурӯҳҳои ифротӣ пеш аз ҳама тавассути баланд бардоштани сатҳи дониш, худшиносӣ, ватандӯстӣ ва фароҳам овардани шароити мусоид барои таҳсилу фаъолияти созанда имконпазир аст. Таъкид гардид, ки иттилооти бардурӯғ ва таблиғоти ифротӣ аксаран тавассути шабакаҳои иҷтимоӣ паҳн мешаванд ва ҷавонон бояд фарҳанги истифодаи дурусти фазои иттилоотиро риоя намоянд.

Дар ҷараёни акция иштирокчиён перомуни роҳҳои пешгирии ифротгароӣ, таҳкими таҳаммулпазирӣ ва эҳтиром ба арзишҳои миллӣ ва умумибашарӣ мубодилаи афкор намуданд. Қайд гардид, ки таҳкими ҳамкории оила, муассисаҳои таълимӣ ва ҷомеа дар тарбияи насли наврас нақши калидӣ дорад.

Волонтёрон инчунин аҳаммияти ташкили чорабиниҳои фарҳангӣ, варзишӣ ва маърифатиро ҳамчун воситаи самараноки ҷалби ҷавонон ба фаъолиятҳои созанда ва дур нигоҳ доштани онҳо аз таъсири гурӯҳҳои тундрав таъкид карданд.

Аксияи тарғиботӣ дар фазои ҳамдилӣ ва масъулияти шаҳрвандӣ баргузор гардида, паёми равшан дошт: ҷавонони ноҳия ҷонибдори сулҳ, ваҳдат ва рушди устувори ҷомеа мебошанд ва ҳама гуна амалҳои террористӣ ва хушунатомезро қатъиян маҳкум менамоянд.

Ташкилкунандагон изҳор доштанд, ки чунин чорабиниҳо минбаъд низ баргузор гардида, ҷиҳати таҳкими фарҳанги ҳуқуқӣ, баланд бардоштани маърифати сиёсӣ ва пешгирии ҳама гуна зуҳуроти номатлуб миёни ҷавонон тадбирҳои иловагӣ амалӣ карда мешаванд.

Бо баргузории чунин акцияҳо ҷавонон на танҳо мавқеи шаҳрвандии худро иброз менамоянд, балки саҳми худро дар ҳифзи амният, субот ва ояндаи осоиштаи кишвар низ мегузоранд.

АКС: Кумитаи кор бо ҷавонон ва варзиши назди Ҳукумати Ҷумҳурии Тоҷикистон