Душанбе, 02 апрел, – АИ «Корвон Иттилоот». Дастаи мунтахаби футболи Тоҷикистон ба яке аз дастовардҳои муҳимтарини таърихи худ ноил гардида, роҳхати иштирок дар қисми ниҳоии Ҷоми Осиё–2027-ро ба даст овард. Бозии ҳалкунанда бар зидди тими Филиппин бо ҳисоби 1:1 анҷом ёфта, барои ишғоли ҷойи аввал дар гурӯҳ кофӣ буд.

Вохӯрӣ шоми 31 март дар Варзишгоҳи марказии Ҳисор баргузор шуда, то лаҳзаҳои охир пуршиддат ҷараён гирифт. Голи ягонаи тими Тоҷикистонро Шериддин Бобоев ба самар расонида, бори дигар нақши калидии худро дар ҳайати даста исбот намуд.

Дар марҳилаи интихобӣ дастаи Тоҷикистон дар гурӯҳи «А» бо дастаҳои Филиппин, Тимори Шарқӣ ва Малдив рақобат намуд. Пас аз шаш бозӣ ду дастаи пешсаф — Тоҷикистон ва Филиппин — бо 14-имтиёзӣ баробар шуданд.

Аммо аз рӯи фарқи тӯбҳои зада ва гузаронидашуда бартарӣ ба ҷониби Тоҷикистон гузашт ва маҳз ҳамин омил ба даста имкони роҳёбӣ ба қисми ниҳоиро фароҳам овард.

Марҳилаи интихобӣ бо рақобати шадид фарқ мекард: 24 даста дар 6 гурӯҳ барои роҳхат мубориза бурданд ва танҳо ғолибони гурӯҳҳо ба даври ниҳоӣ роҳ меёфтанд.

Ҳамзамон, 18 дастаи дигар тавассути интихобии Ҷоми ҷаҳон–2026 пешакӣ роҳхат гирифта буданд. Дар чунин шароит муваффақияти Тоҷикистон натиҷаи кори пайваста ва муназзами даста арзёбӣ мегардад.

Қисми ниҳоии Ҷоми Осиё–2027 аз 15 январ то 8 феврал дар Арабистони Саудӣ баргузор мешавад. Дар он 24 дастаи беҳтарини қора иштирок мекунанд.

Барои Тоҷикистон ин имкониятест барои нишон додани қобилият дар сатҳи баланд ва таҳкими мавқеи худ дар футболи Осиё.

Роҳёбӣ ба қисми ниҳоии Ҷоми Осиё нишонаи рушду пешрафти футбол дар Тоҷикистон мебошад. Ин дастовард натиҷаи талошҳои дарозмуддат дар самти рушди инфрасохтор, омодасозии бозигарон ва баланд бардоштани сатҳи рақобат мебошад.

Ин пирӯзӣ на танҳо дастоварди варзишӣ, балки мояи ифтихори миллӣ буда, метавонад насли ҷавонро ба варзиш илҳом бахшад.

Акс: Федератсияи футболи Тоҷикистон