Душанбе, 28 март, – АИ «Корвон Иттилоот». Сафари давлатии Президенти Ҷумҳурии Тоҷикистон Эмомали Рахмон ба Ҷумҳурии Ӯзбекистон идомаи муҳимми фарҳангиву таърихӣ касб намуд: аз Тошканд 27 март Сарвари давлати Тоҷикистон ба шаҳри қадимаи Бухоро ворид гардид — шаҳре, ки дар тӯли асрҳо ҳамчун пули тамаддунӣ ва маънавии минтақа хизмат кардааст.
Дар фурудгоҳи байналмилалии Бухоро меҳмони олиқадрро Президенти Ҷумҳурии Ӯзбекистон Шавкат Мирзиёев самимона истиқбол гирифт. Муҳити тантанавӣ, ороиши идона ва барномаи рангини фарҳангӣ бо иштироки ҳунармандони ӯзбек на танҳо аҳамияти расмии сафарро таъкид намуд, балки рамзи равшани иродаи сиёсӣ барои таҳкими муносибатҳои бародаронаи ду миллат гардид.
Солҳои охир Душанбе ва Тошканд ҳамкориҳоро пайваста густариш дода, иродаи сиёсиро ба иқдомҳои амалӣ табдил медиҳанд — аз ҳамкориҳои иқтисодӣ то лоиҳаҳои фарҳангиву башардӯстона. Дар ин замина, боздиди муштараки ёдгориҳои таърихии Бухоро аҳамияти хоса пайдо кард.
Ташрифи Президенти кишвари мо муҳтарам Эмомалӣ Раҳмон дар шаҳри Бухоро бо боздид аз Қалъаи Бухоро, Маҷмааи таърихию ёдгорӣ ва оромгоҳи Баҳоуддини Нақшбанд, Маҷмааи “Лаби ҳавз”, Маҷмааи меъмории “Пои Калон” ва Оромгоҳи Исмоили Сомонӣ ҷараён гирифт.
Оромгоҳи сулолавии Сомониён, ки ёдгории меъмории асрҳои IX-X мебошад, дар маркази таваҷҷуҳ қарор гирифт. Ин шоҳкори меъморӣ, ки бо фармони Исмоили Сомони дар охири асри IX бунёд шудааст, то имрӯз хусусиятҳои нодири меъмории қадимаро ҳифз намудааст.
Ин мақбара дорои шакли мураббаъ буда, бо гумбази бошукӯҳ ва чор манораи ороишӣ иҳота шудааст. Бурҷҳои мустаҳкам дар гӯшаҳо устуворӣ ва мутаносибии биноиро таъмин намуда, онро ба намунаи барҷастаи санъати меъмории давраи худ табдил медиҳанд. Дар дохили он худи Исмоил, писараш Насри II ва намояндагони сулола дафн шудаанд.
Имрӯз ин ёдгорӣ қариб ягона намунаи пурра ҳифзшуда аз давраи Сомониён буда, ба феҳристи мероси ҷаҳонии ЮНЕСКО дохил шудааст. Ҳар рӯз садҳо сайёҳон аз гӯшаву канори ҷаҳон барои тамошои он меоянд.
Боздиди ин макон аз ҷониби сарони давлатҳо танҳо хусусияти сайёҳӣ надошта, балки маънии амиқи сиёсиву таърихӣ низ дорад. Дар давраи истиқлолият бо ибтикори Эмомалӣ Раҳмон мақоми таърихии Исмоили Сомонӣ ҳамчун поягузори давлатдории тоҷикон эҳё гардид. Соли 1999 ҷашни 1100-солагии давлати Сомониён бо шукӯҳ таҷлил шуд, дар Душанбе муҷассамаи ӯ гузошта шуд, асъори миллӣ «сомонӣ» ном гирифт ва яке аз ноҳияҳои пойтахт низ ба номи ӯ гузошта шуд.
Ҳамин тариқ, сафари Бухоро танҳо бахше аз барномаи расмӣ набуда, балки инъикоси хотираи муштараки таърихӣ мебошад, ки имрӯз заминаи нави ҳамкориҳои минтақавиро ташкил медиҳад. Бо такя ба гузашта, Душанбе ва Тошканд ояндаи муштаракро бо эътимод, наздикии фарҳангӣ ва шарикии стратегӣ бунёд мекунанд.
Акс: Хадамоти матбуоти Президенти Ҷумҳурии Тоҷикистон