Душанбе, 16 сентябр, – АИ «Корвон Иттилоот». Дар Институти омӯзиши масъалаҳои давлатҳои Осиё ва Аврупои Академияи миллии илмҳои Тоҷикистон конфронсияи илмӣ-амалии ҷумҳуриявӣ баргузор гардид, ки ба масъалаҳои геополитикӣ ва геоиқтисодии Осиёи Марказӣ дар доираи лоиҳаи CASA-1000 бахшида шуд.

Дар ҷаласа мавзӯъҳои асосӣ ба баррасӣ гирифта шуданд: «Ҳамкории илмию фарҳангии кишварҳои Осиёи Марказӣ дар доираи CASA-1000», «Манфиатҳои геосиёсии минтақа», «Таъмини амнияти нақлиётӣ ва энергетикӣ», «Ташаббусҳои энергетикӣ Пешвои миллат Эмомалӣ Раҳмон дар доираи CASA-1000», «Нақши CASA-1000 дар истиқлолияти энергетикии Осиёи Марказӣ» ва «Нақши лоиҳа дар рушди иқтисодиёти Тоҷикистон».

Конфронсия ҳамчун платформаи муҳими муҳокимаи татбиқи муносибатҳои геоиқтисодӣ ва геосиёсии кишварҳои минтақа хизмат намуд. Олимон ва коршиносон пешниҳодҳои мушаххас барои рушди соҳаи энергетика, тақвияти инфрасохтор ва ҷалби сармоягузории хориҷиро иброз доштанд.

Лоиҳаи CASA-1000 на танҳо ташаббуси энергетикӣ, балки абзори стратегӣ барои ҳамгироии иқтисодии кишварҳои Осиёи Марказӣ бо Афғонистон ва Покистон ба шумор меравад. Барои Тоҷикистон, ки ҳамчун манбаи асосии неруи барқ дар лоиҳа ширкат дорад, ин иқдом аҳамияти муҳим дар рушди инфрасохтор, такмил додани қонунгузорӣ ва баланд бардоштани ҷалби сармоягузориҳои байналмилалиро дорад.

Мутахассисон таъкид карданд, ки ҳамкории минтақавӣ дар доираи CASA-1000 заминаи устувори рушди равобити иқтисодӣ, сиёсӣ ва фарҳангӣ байни кишварҳои минтақа мегузорад, шиддати эҳтимолии геосиёсиро коҳиш медиҳад ва сатҳи зиндагии мардумро баланд мебардорад. Бо вуҷуди мушкилоти минтақа, амалӣ гардонидани лоиҳа монеаҳои энергетикии кишварро қисман бартараф намуда, рушди саноат ва ҷалби сармояи хориҷиро тақвият мебахшад.

АКС: Институти омӯзиши масъалаҳои давлатҳои Осиё ва Аврупои Академияи миллии илмҳои Тоҷикистон