Душанбе, 24 ноябр, – АИ Корвон Иттилоот. 23 ноябри соли 2025 дар деҳаи Сугдиён, ҷамоати деҳоти Алмосии шаҳри Ҳисор маросими ифтитоҳи пули нави автомобилӣ баргузор гардид. Ин иншоот ба ифтихори 35-солагии Истиқлоли давлатии Тоҷикистон ба истифода дода шуд. Дар бораи ин воқеа аз ҷониби Мақомоти иҷроияи ҳокимияти давлатии шаҳри Ҳисор хабар дода шуд.
Корҳои сохтмонӣ, ки арзиши онҳо беш аз 4 миллион сомони мебошад, моҳи июл оғоз ёфта, бо дастгирии соҳибкорон ва сокинони маҳаллӣ анҷом дода шуданд. Пули нав равуои бехатар ва мунтазамро таъмин намуда, барои фаъолияти нақлиёт дар ин минтақа имкониятҳои васеъ фароҳам меорад.
Пули қаблӣ ба талаботи замон мутобиқат намекард ва бинобар боришоти шадид чандин бор вайрон мешуд. Ин ҳолат ба ҳаракати нақлиёт халал расонда, барои сокинон ва меҳмонони минтақа мушкилоти ҷиддӣ ба вуҷуд меовард.
Ифтитоҳи пули нав қадами муҳим дар рушди инфрасохтори нақлиётии Ҳисор ва таҳкими имкониятҳои иҷтимоиву иқтисодии минтақа ба ҳисоб меравад.
АКС: Мақомоти иҷроияи ҳокимияти давлатии шаҳри Ҳисор