Душанбе, 16 феврал, – АИ «Корвон Иттилоот». 12 феврал дар пойтахт мулоқоти муовини Вазири корҳои хориҷии Ҷумҳурии Тоҷикистон Нигина Ализода бо Сафири Фавқулода ва Мухтори Ҷумҳурии Қазоқистон дар Ҷумҳурии Тоҷикистон Валихан Туреханoв баргузор гардид.

Тавре аз Вазорати корҳои хориҷии Ҷумҳурии Тоҷикистон хабар доданд, ҷонибҳо доир ба вазъи кунунӣ ва дурнамои рушди маҷмӯи муносибатҳои дуҷониба, инчунин ҳамкорӣ дар доираи созмонҳои байналмилалӣ табодули афкор намуданд.

Муносибатҳои Тоҷикистону Қазоқистон бо тамосҳои фаъоли сиёсӣ, ҳамкории тиҷоратию иқтисодӣ ва робитаҳои гуманитарӣ фарқ мекунанд. Солҳои охир таваҷҷуҳи махсус ба густариши ҳамкорӣ дар соҳаҳои нақлиёт, логистика, амнияти озуқаворӣ, энергетика ва кооператсияи саноатӣ равона шудааст.

Дар ҷараёни мулоқот масъалаи таҳкими минбаъдаи заминаи шартномавию ҳуқуқӣ ва ҳамоҳангсозии мавқеъҳо дар минбарҳои байналмилалӣ мавриди баррасӣ қарор гирифт.

Ҷонибҳо аҳамияти ҳамкории зичро дар доираи созмонҳои байналмилалӣ таъкид намуда, омодагии худро барои идомаи ҳамгироии мавқеъҳо дар масъалаҳои муҳими минтақавӣ ва ҷаҳонӣ изҳор карданд.

Дар анҷоми мулоқот омодагии мутақобила барои таҳкими ҳамкории байниидоравӣ ва идомаи машваратҳои мунтазам таъкид гардид.

Муколамаи устувори сиёсӣ миёни Душанбе ва Остона яке аз омилҳои муҳими таҳкими субот ва эътимод дар минтақа ба шумор меравад.

АКС: Вазорати корҳои хориҷии Ҷумҳурии Тоҷикистон