Душанбе, 03 ноябр, – АИ «Корвон Иттилоот».  Дар Академияи Вазорати корҳои дохилии Ҷумҳурии Тоҷикистон 1 ноябр нишасте баргузор гардид, ки дар он тамоюлҳои муосири паҳншавии идеологияи экстремистӣ дар шабакаи Интернет ва роҳҳои мубориза бо он мавриди баррасӣ қарор гирифтанд. Дар чорабинӣ намояндагони мақомоти ҳифзи ҳуқуқ, коршиносони соҳаи амният ва технологияҳои рақамӣ ширкат варзиданд.

Бино ба иттилои АИ «Корвон иттилоот», иштирокчиён масъалаҳои муҳими ҳамкории сохторҳои давлатӣ дар самти мубориза бо экстремизм ва терроризмро муҳокима намуда, таҷриба ва пешниҳодҳои худро оид ба такмили фаъолияти ҳамкорӣ мубодила карданд.

Таваҷҷуҳи хоса ба таҳлили механизмҳои паҳншавии ғояҳои ифротгароёна дар фазои маҷозӣ — аз ҷумла шабакаҳои иҷтимоӣ, паёмрасонҳо ва минбарҳои пӯшидаи интернетӣ — равона гардид. Иштирокчиён таъкид намуданд, ки дар замони рушди босуръати технологияҳои рақамӣ мубориза бо киберэкстремизм муносибати ҳамҷабҳаро тақозо мекунад, ки дар он сохторҳои давлатӣ, муассисаҳои илмӣ ва ҷомеаи шаҳрвандӣ нақши муҳим доранд.

Дар поёни нишаст зарурати зерин таъкид гардид:

• такмили заминаи меъёриву ҳуқуқӣ дар соҳаи танзими фазои интернет,
• истифодаи абзорҳои инноватсионии мониторинг ва таҳлили муҳтавои рақамӣ,
• баланд бардоштани саводи рақамии аҳолӣ, махсусан ҷавонон.

Зикр гардид, ки танҳо тавассути тадбирҳои пешгирикунанда, маърифатноксозӣ ва истифодаи технологияи муосир метавон ба ифротгароии идеологӣ муқовимати муассир нишон дод ва амнияти иттилоотии кишварро таҳким бахшид.

Акс аз манбаъҳои боз