Душанбе, 11 март, – АИ «Корвон Иттилоот». 10 марти соли 2026 дар шаҳри Хороғ ҷаласаи сайёри Комиссияи байниидоравӣ оид ба мубориза бо тиҷорати одамон баргузор гардид, хабар медиҳад Вазорати корҳои дохилии Ҷумҳурии Тоҷикистон. Мақсади чорабинӣ таҳлили муфассали вазъият дар соҳаи мубориза бо тиҷорати одамон, таҳияи чораҳои нави пешгирӣ ва баланд бардоштани самаранокии ҳамкории байниидоравӣ дар сатҳи маҳаллӣ буд.
Ҷаласаро раиси Комиссия, муовини якуми вазири корҳои дохилӣ Абдурахмон Аламшозода роҳбарӣ кард. Дар суханронии худ ӯ зарурати ба роҳ мондани муносибати систематикӣ ба мушкилотро таъкид намуд ва гуфт, ки тиҷорати одамон ҳанӯз яке аз таҳдидҳои ҷиддӣ ба ҳуқуқ ва озодиҳои шаҳрвандон буда, ба нуфузи байналмилалии кишвар низ таъсири манфӣ мерасонад. Ӯ ба ҳамаи намояндагони мақомоти давлатӣ, ки дар комисия ширкат доранд, тавсия дод, ки диққати махсусро ба ошкоркунии зудтари хатарҳо, пешгирии саривақтӣ ва ҳамоҳангсозии кор байни мақомоти ҳифзи ҳуқуқ, хадамоти иҷтимоӣ ва ташкилотҳои ғайриҳукуматӣ равона кунанд.
Дар ҷараёни ҷаласа масъалаҳои калидӣ зерин мавриди баррасӣ қарор гирифтанд:
- таҳлили мушкилот ва камбудиҳо дар мубориза бо тиҷорати одамон дар сатҳи маҳаллӣ ва миллӣ;
- усулҳои муосири ошкоркунии ҷиноятҳои марбут ба тиҷорати одамон ва пешгирии онҳо;
- механизмҳои дастгирии қурбониён ва таъмин намудани ҳуқуқ, кӯмакҳои иҷтимоӣ ва ҳифзи психологӣ барои онҳо;
- корҳои пешгирикунанда байни аҳолӣ, аз ҷумла иттилоотдиҳӣ ба шаҳрвандон оид ба хатарҳои тиҷорати одамон ва омӯзиши кормандони мақомоти давлатӣ дар усулҳои шинохти чунин ҷиноятҳо.
Зимни баррасӣ таъкид гардид, ки дар солҳои охир афзоиши ҳолатҳои нақзи ҳуқуқи шаҳрвандон аз ҷониби шахсони алоҳида ва гурӯҳҳои манфиатдор мушоҳида мешавад, ки бо истифода аз хушунат, фиреб, истисмор ё фишор ҳуқуқи инсонро нақз мекунанд. Дар чунин ҳолатҳо шахс ҳамчун объекти хариду фурӯш ва амалҳои ғайриқонунӣ баррасӣ шуда, ба ҳуқуқ ва озодиҳои шахсии ӯ зарари ҷиддӣ мерасад.
Иштирокчиёни ҷаласа қайд карданд, ки самтҳои асосии фаъолияти комисия ин тақвияти ҳамкории байниидоравӣ, таҳкими системаи мониторинг ва мубодилаи маълумот, ҳамчунин гузаронидани барномаҳои мунтазами омӯзишӣ барои кормандони мақомоти ҳифзи ҳуқуқ, хадамоти иҷтимоӣ ва намояндагони ташкилотҳои ҷамъиятӣ мебошад. Ғайр аз ин, роҳҳои густариши ҳамкорӣ бо созмонҳои байналмилалӣ, ки дар ҳифзи ҳуқуқи инсон фаъолият мекунанд, барои ворид намудани беҳтарин таҷриба ва баланд бардоштани самаранокии мубориза бо тиҷорати одамон баррасӣ шуданд.
Дар фарҷоми ҷаласа, Абдурахмон Аламшозода зарурати муносибати систематикӣ ба масъала, ҷалби фаъолонаи мақомоти худидоракунии маҳаллӣ, ташкилотҳои ҷамъиятӣ ва шаҳрвандон ба корҳои пешгирикунанда ва таъкид кард, ки танҳо чораҳои комплексӣ, аз ҷумла танзими ҳуқуқӣ, барномаҳои таълимӣ ва дастгирии иҷтимоӣ, метавонанд хатари тиҷорати одамонро кам кунанд ва ҳифзи шаҳрвандони осебпазирро таъмин намоянд.
АКС: Вазорати корҳои дохилии Ҷумҳурии Тоҷикистон