Душанбе, 16 сентябр, – АИ «Корвон Иттилоот». Дар доираи таҷлили 34-солагии Истиқлоли давлатии Ҷумҳурии Тоҷикистон ва эълон гардидани солҳои 2020–2040 ҳамчун «Бистсолаи омӯзиш ва рушди фанҳои табиатшиносӣ, дақиқ ва риёзӣ дар соҳаи илму маориф» дар Маркази илмии Хуҷанд ду озмоишгоҳи муосир — «Биотехнология ва биофизика» ва «Физика ва нанотехнология» — ба истифода дода шуданд.

Озмоишгоҳҳо бо 20 навъи техникаю технологияи муосир муҷаҳҳаз мебошанд ва ба олимону муҳаққиқони марказ имкон медиҳанд, ки корҳои таҳқиқотии пешқадамро пеш баранд, равандҳои нави илмӣ ва инноватсионӣ ҷорӣ кунанд ва мутахассисони баландихтисосро дар бахшҳои калидӣ омода созанд.

Президенти Академияи миллии илмҳои Тоҷикистон Қобилҷон Хушвахтзода таъкид намуд, ки «сарпоягузорӣ ба рушди фанҳои дақиқ, табиатшиносӣ, риёзӣ ва зеҳни сунъӣ омилест, ки имкон медиҳад кишвари мо ба равандҳои ҷаҳонии илмӣ ворид гардад ва корхонаҳои саноатии ҷумҳуриро бо равандҳои технологӣ ва рақобатпазир таъмин намояд».

Ифтитоҳи ду озмоишгоҳи нав дар Маркази илмии Хуҷанд таъкид мекунад, ки Тоҷикистон рушди илмро бо ниёзҳои саноат ва тамоюлҳои ҷаҳонии технологӣ ҳамоҳанг мекунад. Ин қадами стратегӣ барои пешрафти илмӣ-технологӣ, баланд бардоштани рақобатпазирии иқтисодиёт ва таҳкими ҳамкории байналмилалии илмӣ аҳамияти махсус дорад.

АКС: Академияи миллии илмҳои Тоҷикистон