МОСКВА, 10 сентябри соли 2025 АИ «Караван Инфо».  Дар Непал дар пасманзари эътирозҳои давомдор бетартибиҳои нав сар заданд. Тибқи иттилои портали Khabarhub, издиҳом кӯшиш намуданд, ки ба зиндони ноҳияи Моранг, ки дар он зиёда аз 1,1 ҳазор маҳбус нигоҳ дошта мешаванд, ҳамла кунанд. Дар посух полис 15 тирпарронии огоҳкунанда анҷом дод. Ҳеҷ кадоме аз одамон осеб надидаанд.

Ба гуфтаи нашрия, иштирокчиёни аксия шиорҳои ҷонибдории озод намудани маҳбусонро садо медоданд. Пас аз тирпарронии огоҳкунанда, издиҳом ақиб монд ва барои тақвияти муҳофизат ба ноҳия низомиён фиристода шуданд.

Шиддат дар кишвар чанд ҳафта боз идома дорад. Сабаби ин бастани як қатор шабакаҳои маъмули иҷтимоӣ буд, ки дар вазорати алоқа ва технологияҳои иттилоотӣ сабти ном нашудаанд. Ин қарор боиси аксияҳои оммавии ҷавонон шуд, ки ВАО онҳоро “Инқилоби насли Z” номид.

Эътирозҳо ба бархӯрдҳои шадид табдил ёфтанд: 19 нафар кушта ва зиёда аз 300 нафар захмӣ шуданд. Бо вуҷуди он ки ҳукумат баъдтар манъкуниро бекор намуд, намоишҳо қатъ нашуданд. Иштирокчиёни онҳо истеъфои сарвазир Шарма Олиро талаб намуданд.

Дар ҷараёни бетартибиҳо эътирозгарон қароргоҳи хусусии ӯ, бинои парлумон ва дафтари ҳизби ҳокимро оташ заданд. Бо фишори намоишҳои кӯчагӣ сарвазир истеъфо дод ва аъзои ҳукумат бо чархболҳо аз хонаҳои онҳо берун намуда шуданд.

Вазъият дар Непал хеле ташаннуҷнок боқӣ мемонад. Эътирозҳое, ки бо сабаби маҳдудиятҳои рақамӣ оғоз ёфта буданд, ба бӯҳрони сиёсӣ табдил ёфтанд, ки суботи кишварро зери суол гузошт.

Таҳлилгарон қайд мекунанд, ки “Инқилоби насли Z” аввалин ҳаракати бузурги ҷавонон дар таърихи Непал буд, ки бевосита ба тағйири ҳокимият таъсир расонид.

Аксҳо: AP Photo / Niranjan Shrestha