Душанбе, 16 март, – АИ «Корвон Иттилоот». Дар Маркази миллии тиббии «Шифобахш» бори аввал дар кишвар амалиёти мураккаби микрохирургиро барои бардошти кистаи коллоидии пояи сеюми меъдаи майнаи сар ба таври комил иҷро карданд. Дар ин бора Вазорати тандурустӣ ва ҳифзи иҷтимоии аҳолии Ҷумҳурии Тоҷикистон хабар дод.

Муолиҷаи ҷарроҳиро бо истифодаи микроскопи муосир ва усули транскаллёзӣ анҷом доданд, ки ба ҷарроҳ имкон медиҳад ба сохторҳои амиқи майна дастрасӣ пайдо кунад, бе зарари зиёди бофтаҳои атроф. Ин равиш яке аз мураккабтарин ва пешрафтатарин усулҳои нейрохирургияи муосир ба ҳисоб меравад.

Амалиётро мутахассисони шинохтаи тоҷик — доктори илми тиб, профессор Хуршед Рахмонзода ва номзади илми тиб, дотсент Нарзулло Рахимзода анҷом доданд. Ба таъкиди мутахассисон, гузаронидани чунин ҷарроҳӣ малакаи баланд, нақшакашии дақиқ ва истифодаи таҷҳизоти махсусро талаб мекунад.

Кистаи коллоидии сеюми меъдаи майна ба гурӯҳи ташаккули нодир ва потенсиалӣ хатарнок дохил мешавад. Бо афзоиш ёфтани андозааш метавонад гардиши моеъи мағзи сутунмӯҳраро халалдор созад ва оқибатҳои ҷиддии тиббӣ ба монанди афзоиши фишори дохилисарӣ, сардард, халалҳои хотира ва дигар мушкилоти неврологиро ба вуҷуд оварад. Аз ҳамин рӯ, табобати саривақтии ҷарроҳӣ аҳамияти ҳалкунанда дорад.

Ба иттилои Вазорати тандурустӣ ва ҳифзи иҷтимоии аҳолии Ҷумҳурии Тоҷикистон, амалиёт бомуваффақият анҷом ёфт. Пас аз ҷарроҳӣ вазъи бемор ба таври назаррас беҳтар шуд. Ҳоло ягон норасоии неврологӣ, ки ба фаъолияти ҷисмонӣ ва қобилияти кор таъсир расонад, мушоҳида намешавад ва раванди барқароршавӣ дар самти мусбат ҷараён дорад.

Гузаронидани чунин амалиёт бо истифодаи технологияи микроҷарроҳӣ ба беморон имкон медиҳад, ки муддати барқароршавӣ хеле кӯтоҳ шавад. Бо назардошти усули каминвазивӣ бемор метавонад дастикам 3–4 рӯз пас аз ҷарроҳӣ аз муассисаи тиббӣ бароварда шавад, ки ин самаранокии табобат ва бароҳатии беморро хеле баланд мебардорад.

Мутахассисон таъкид мекунанд, ки муваффақияти гузаронидани чунин амалиёт шаҳодати тараққиёти тибби баландтехнологӣ дар Тоҷикистон, васеъ шудани имкониятҳои нейрохирургияи миллӣ ва баланд бардоштани сатҳи хизматрасонии тиббӣ ба аҳолӣ мебошад.

АКС: Вазорати тандурустӣ ва ҳифзи иҷтимоии аҳолии Ҷумҳурии Тоҷикистон