Душанбе, 04 феврал, – АИ «Корвон Иттилоот». Аз 1 январи соли ҷорӣ дар Ҷумҳурии Тоҷикистон нархномаи оби нӯшокӣ, обрав (канализатсия), баровардани партовҳои маишӣ ва як қатор хизматрасониҳои коммуналӣ баланд бардошта шуд. Барои аҳолӣ афзоиши нархҳо 15 фоиз, барои корхонаҳо — 30 фоиз-ро ташкил медиҳад. Дар ин бора рӯзи 2 феврал дар нишасти матбуотӣ раиси Кумитаи хоҷагии манзилию коммуналии кишвар Ҷамшед Табарзода хабар дод.

Ба гуфтаи ӯ, бозбинӣ шудани нархномаҳо пеш аз ҳама ба баланд бардоштани сифати хизматрасониҳои коммуналӣ, навсозии инфрасохтори муҳандисӣ ва таъмини фаъолияти устувори корхонаҳои соҳавӣ равона шудааст.

Нархномаи обтаъминкунӣ ва канализатсия

Тибқи қарор, арзиши 1 метри мукааб оби нӯшокӣ барои аҳолӣ ҳангоми мавҷуд будани ҳисобкунак 1 сомонию 50 дирам муқаррар шудааст.
Нархномаи обрав (канализатсия) 76 дирам барои 1 м³ мебошад.

Бо дарназардошти меъёри истеъмол — 5,4 м³ дар як моҳ ба як нафар (180 литр дар як шабонарӯз), пардохти моҳона чунин аст:

• 8 сомонию 10 дирам — барои оби нӯшокӣ;
• 12 сомонию 20 дирам — бо дарназардошти канализатсия ҳангоми набудани ҳисобкунак.

Барои муассисаҳои буҷетӣ арзиши 1 м³ об 3 сомонию 15 дирам, барои корхонаҳои худмаблағгузор ва хусусӣ — 5 сомонию 43 дирам муқаррар шудааст.

Фарқияти минтақавии нархҳо

Нархномаҳо вобаста ба минтақа фарқ мекунанд.

Оби нӯшокӣ:

• барои аҳолӣ — аз 1,40 то 1,82 сомонӣ;
• барои муассисаҳои буҷетӣ — аз 2,26 то 3,90 сомонӣ;
• барои корхонаҳо ва ташкилотҳо — аз 4,52 то 7,25 сомонӣ.

Хизматрасониҳои канализатсионӣ:

• барои аҳолӣ — аз 0,76 то 0,99 сомонӣ;
• барои муассисаҳои буҷетӣ — аз 1,64 то 2,05 сомонӣ;
• барои корхонаҳо ва ташкилотҳо — аз 2,83 то 3,38 сомонӣ.

Баровардани партовҳои маишӣ

Нархномаи миёнаи баровардани партовҳои сахти маишӣ 4 сомонию 74 дирам муқаррар шудааст.

Аз ҷумла:

• баровардани партовҳо — 6,83 сомонӣ барои 1 м³;
• баровардани партовҳо бо автомашинаи КАМАЗ — 35,65 сомонӣ барои 1 м³;
• тозакунии санитарии ҳудуд — 1,13 сомонӣ барои 1 м²;
• хизматрасонии фонди манзил — 0,17 сомонӣ барои 1 м².

Ҳангоми зиёд будани масофаи интиқол барои ҳар як километри иловагӣ 0,80 сомонӣ ситонида мешавад.

Дар куҷо татбиқ мегардад

Нархномаҳои нав дар зиёда аз 45 шаҳр ва ноҳияи кишвар амал мекунанд, аз ҷумла дар Бохтар, Кӯлоб, Конибодом, Истаравшан, Панҷакент, Ваҳдат, Турсунзода, Ҳисор, Норак, Рашт, Исфара, Мурғоб, Дарвоз, Рӯшон, Шуғнон, Рошткалъа, Варзоб, Ёвон, Фархор, Хуросон, Данғара ва дигар минтақаҳо.

Ҳамзамон таъкид мешавад, ки на ҳамаи корхонаҳои хоҷагии манзилию коммуналӣ тобеи Кумитаи соҳавӣ мебошанд ва дар баъзе минтақаҳо нархномаҳо аз ҷониби мақомоти маҳаллӣ бо дарназардошти хусусиятҳои минтақавӣ тасдиқ карда мешаванд.

Вазъ дар Душанбе

Ёдовар мешавем, ки дар шаҳри Душанбе нархномаи обтаъминкунӣ ва канализатсия аз 1 сентябри соли гузашта боло бурда шудааст.

Тибқи қарор:

• барои аҳолӣ (бо ҳисобкунак) — 2,60 сомонӣ барои 1 м³ (қаблан — 2,26);
• барои муассисаҳои буҷетӣ — 3,59 сомонӣ (қаблан — 2,77);
• барои ташкилотҳои тиҷоратӣ — 9,10 сомонӣ (қаблан — 4,28).

Пардохти моҳона ба як нафар бидуни ҳисобкунак:

• дар хонаҳои бисёрошёна — 28,07 сомонӣ (қаблан — 10,61);
• дар хонаҳои хусусӣ бо обу канализатсия — 23,39 сомонӣ (қаблан — 7,10);
• ҳангоми истифодаи сутунчаҳои кӯчагӣ — 7,41 сомонӣ (қаблан — 4,94).

Фото: lugvoda.com