Душанбе, 12 сентябр, – АИ «Корвон Иттилоот». Дар шаҳри Душанбе намоишгоҳи аксҳо оғоз гардид, ки сокинон ва меҳмонони пойтахтро бо ҳуҷҷатҳо ва тасвирҳои нодири бойгонӣ шинос мекунад. Намоишгоҳ ба нақши дипломатияи шӯравӣ дар солҳои Ҷанги Дуюми Ҷаҳон бахшида шуда, аз 10 то 19 сентябр дар «Фазои русӣ»-и Донишгоҳи русиву тоҷикии (славянӣ) амал мекунад.

Дар экспозитсия аксҳо ва санадҳои нодир ба намоиш гузошта шудаанд, ки фаъолияти гуногунсамтаи Комиссариати халқии корҳои хориҷии СССР-ро дар шароити ҷанг инъикос мекунанд. Меҳмонон метавонанд бубинанд, ки дипломатҳои шӯравӣ чӣ гуна манфиатҳои кишварро ҳимоя мекарданд ва заминаҳои тартиботи нави пас аз ҷангро мегузоштанд.

Қисми марказии намоишгоҳ ба шахсиятҳои маъруфи дипломатӣ бахшида шудааст:

• Вячеслав Молотов — комиссари халқии корҳои хориҷӣ, иштирокчии гуфтушунидҳои сарнавиштсоз;
• Андрей Громыко — дипломати ҷавон, ки дар оянда ба яке аз шахсиятҳои нуфузманди давлати шӯравӣ табдил ёфт;
• Александра Коллонтай — аввалин зан-сафир дар таърихи ҷаҳон, ки нақши намоён дар дипломатияи солҳои ҷанг дошт.

Маҳорати сиёсӣ ва устувории онҳо барои муваффақиятҳои Иттиҳоди Шӯравӣ дар «фронти дипломатӣ» нақши ҳалкунанда бозид.

Намоишгоҳ нақши муҳимми дипломатияи шӯравиро дар ташаккули эътилофи зиддигитлерӣ, таҳкими равобит бо ИМА ва Британияи Кабир ва омодагии музокироти муҳими байналмилалӣ равшан месозад. Ҳуҷҷатҳои бойгонӣ ба тамошобинон имкон медиҳанд, ки равандҳои ташаккули тартиботи ҷаҳонии пас аз ҷангро амиқтар дарк намоянд.

Намоишгоҳ барои ҳамаи хоҳишмандон бо даромади ройгон дастрас аст.

Ташкилкунандагон таъкид мекунанд, ки чунин чорабиниҳо барои ҳифзи хотираи таърихӣ ва баланд бардоштани маърифати насли ҷавон дар бораи нақши дипломатия дар сарнавишти кишвар ва ҷаҳон муҳим мебошанд.

АКС: Донишгоҳи русиву тоҷикии (славянӣ)