Душанбе, 02 октябр, – АИ «Корвон Иттилоот». Дар шаҳри Иркутск Конфронси VIII байналмилалии илмӣ-амалӣ таҳти унвони «Рушди соҳибкории хурд дар минтақаи Байкал» баргузор гардид. Чорабинӣ бо ташаббуси Донишгоҳи давлатии тиҷорати Тоҷикистон ва Донишгоҳи давлатии Байкал баргузор шуд.
Иштирокдорони конфронс таъкид карданд, ки соҳибкории хурд нақши муҳим дар рушди инноватсионӣ ва устувории иқтисод ҳам дар Тоҷикистон ва ҳам дар минтақаи Байкал дорад. Дар шароити буҳронҳои ҷаҳонии иқтисодӣ маҳз соҳибкории хурд метавонад зудтар мутобиқ шавад, ҷойҳои нави корӣ фароҳам оварад ва ба ҷорӣ намудани технологияҳои нав мусоидат намояд.
Иллова бар ин, рақамикунонӣ ва истифодаи технологияҳои нав ҳамчун омили калидӣ барои тавсеаи фаъолияти соҳибкорӣ ва ташкили лоиҳаҳои рақобатпазир арзёбӣ шуд.
Дар конфронс ба зарурати таҳкими ташаббусҳои муштараки илмӣ ва таълимӣ миёни донишгоҳҳои Тоҷикистон ва Русия таваҷҷуҳи махсус дода шуд. Аз ҷумла:
- амалӣ намудани лоиҳаҳои илмии муштарак,
- роҳандозии стартапҳо ва ташаббусҳои соҳибкорӣ,
- мубодилаи донишҷӯён ва омӯзгорон,
- рушди малакаҳои соҳибкорӣ дар миёни ҷавонон.
Чорабинӣ қадами муҳим дар таҳкими робитаҳои илмӣ ва таълимӣ миёни мактабҳои олии ду кишвар арзёбӣ гардид. Иштирокдорон изҳори боварӣ карданд, ки чунин ташаббусҳо ба ташаккули насли нави соҳибкорон, ки қодир ба фаъолият дар шароити рақобати ҷаҳонӣ ва табдили рақамӣ мебошанд, мусоидат хоҳанд кард.
АКС: Донишгоҳи давлатии тиҷорати Тоҷикистон