Душанбе, 30 март, – АИ «Корвон Иттилоот». 4 апрел дар Муассисаи давлатии «Наврӯзгоҳ»-и шаҳри Душанбе чорабинии фарҳангӣ ва фароғатии «Dushanbe Navruz Fest» доир мегардад. Фестивал аз соати 15:00 то 22:00 идома меёбад, иттилоъ доданд дар Шуъбаи рушди сайёҳии Мақомоти иҷроияи ҳокимияти давлатии шаҳри Душанбе.

Организаторон таъкид мекунанд, ки ҳадафи асосии фестивал — фароҳам овардани фазои идона ва шароити мусоид барои истироҳату фароғати сокинони пойтахт, меҳмонон ва сайёҳон мебошад. Ҳамзамон чорабинӣ барои муаррифии Душанбе ҳамчун маркази муосири фарҳангӣ ва дорои имкониятҳои васеи сайёҳӣ, тақвияти анъанаҳои меҳмондорӣ ва тарғиби суннату одатҳои миллӣ равона шудааст.

Фестивал бо дастгирии Мақомоти иҷроияи ҳокимияти давлатии шаҳри Душанбе ва аз ҷониби Ҷамъияти дорои масъулияти маҳдуди «Бозоршинос» баргузор шуда, ҳамоҳангсозии он ба зиммаи Шуъбаи рушди сайёҳии пойтахт вогузор шудааст.

Барномаи фестивал ваъда медиҳад, ки пурра ва гуногунранг хоҳад буд. Дар он гала-консерт бо иштироки овозхонҳои маъруфи ватанӣ ва ҳунармандони хориҷӣ, намоиш ва фурӯши маҳсулоти ҳунарҳои мардумӣ, инчунин пешниҳоди таомҳои миллӣ, хӯришҳои гуногун, шириниҳо ва нӯшокиҳои ташнагишикан дар назар гирифта шудааст.

Ҳамзамон барои иштирокчиён ва меҳмонон барномаҳои варзишӣ ва зеҳнӣ, викторинаҳо, барномаҳои циркӣ ва театралӣ, сайру саёҳат бо асп, гӯшаҳои махсуси фароғатӣ барои кӯдакон ва дигар фаъолиятҳои интерактивӣ ташкил карда мешаванд. Ин формат фестивалро на танҳо ба як консерт, балки ба фазои пурраи фароғати оилавӣ ва шаҳрӣ табдил медиҳад.

«Dushanbe Navruz Fest» яке аз рӯйдодҳои намоёни фарҳангӣ дар рӯзҳои таҷлили Наврузи байналмилалӣ дар пойтахт мегардад. Барои Душанбе ин на танҳо як чорабинии идона, балки қадами дигар ба сӯи муаррифии шаҳр ҳамчун маркази муосир, боз ва ҷолиби сайёҳӣ мебошад.

Маълумоти иловагӣ дар бораи фестивалро метавонед дар саҳифаҳои расмии Шуъбаи рушди сайёҳии Мақомоти иҷроияи ҳокимияти давлатии шаҳри Душанбе дар Facebook, Instagram, VK, Threads, TikTok, X ва Telegram дастрас намоед.

АКС: Шуъбаи рушди сайёҳии Мақомоти иҷроияи ҳокимияти давлатии шаҳри Душанбе