Душанбе, 10 ноябр, – АИ «Корвон Иттилоот». 11–12 ноябр дар шаҳри Бохтар Форуми байналмилалии сармоягузорӣ «Хатлон Инвест–2025» баргузор мешавад, ки яке аз чорабиниҳои муҳими иқтисодии соли ҷорӣ ба ҳисоб меравад.
Ба иттилои Кумитаи давлатии сармоягузорӣ ва идораи амволи давлатии Ҷумҳурии Тоҷикистон, дар форум сармоягузорону соҳибкорони хориҷӣ ва ватанӣ, намояндагони корпуси дипломатӣ, созмонҳои байналмилалӣ ва шарикони рушд иштирок хоҳанд кард.
Дар байни иштирокчиён ҳайатҳо аз кишварҳои Русия, Узбекистон, Қирғизистон, Туркманистон, Беларус, Қазоқистон, Озарбойҷон, Эрон, Покистон, Чин ва Туркия ҳузур хоҳанд дошт. Ин боз як далели таваҷҷуҳи рӯзафзуни ҷомеаи соҳибкорӣ ба имкониятҳои сармоягузории Тоҷикистон, бахусус минтақаи рӯ ба тараққии вилояти Хатлон мебошад.
Форум дар ду бахши муҳими зерин баргузор мешавад:
- «Сармоягузорӣ барои рушди устувори минтақаҳо» – имкониятҳои рақамикунонӣ, ҳамкории бахши давлатӣ ва хусусӣ ва табдил додани вилояти Хатлон ба маркази иқтисоди муосир;
- «Аз замин то бозор» – рушди занҷираи арзиши иловашуда дар соҳаи кишоварзӣ, масоили содирот ва коркарди маҳсулоти маҳаллӣ.
Дар ҷараёни форум масъалаҳои зерин мавриди муҳокима қарор мегиранд:
- ҷалби сармоя ба кластерҳои агросаноатӣ,
- рақамикунонӣ дар минтақаҳои озоди иқтисодӣ,
- рушди туризм ва ҳунарҳои мардумӣ дар ноҳияҳои кӯҳии вилоят.
Дар доираи «Хатлон Инвест–2025» имзои созишномаҳои нави ҳамкорӣ байни ширкатҳо ва корхонаҳои ватаниву хориҷӣ дар назар дошта шудааст.
Ин ҳуҷҷатҳо заминаи татбиқи лоиҳаҳои муштарак, таъсиси ҷойҳои нави корӣ ва густариши иқтидори содиротии минтақа хоҳанд шуд.
Ба гуфтаи масъулон, форум бояд ба ҷалби сармоягузориҳои мустақими хориҷӣ ва таҳкими имиҷи иқтисодии вилояти Хатлон ҳамчун маркази саноатӣ-аграрии кишвар мусоидат намояд.
Баргузории форуми «Хатлон Инвест–2025» нишонаи равшани сиёсати нави иқтисодии Тоҷикистон мебошад, ки ҳадаф аз он рушди мутавозини минтақавӣ ва ҷалби сармояи хориҷӣ аст.
Вилояти Хатлон бо захираҳои табиӣ, иқтидори кишоварзӣ ва ҷойгиршавии мусоиди ҷуғрофӣ метавонад ба намунаи рушди устувори иқтисодӣ табдил ёбад.
Агар созишномаҳои имзошуда дар амал татбиқ шаванд, Хатлон имкони воқеии табдил ёфтан ба маркази истеҳсолӣ ва содиротии пешқадами Осиёи Марказӣро дорад.
АКС: аз манбаъҳои боз