Душанбе, 26 январ, – АИ «Корвон Иттилоот». Кормандони сафорати ИМА дар Тоҷикистон омодагӣ ва ифтихори худро барои ҳамкорӣ бо шарикони маҳаллӣ ва байналмилалӣ дар ҳифзи ҷомеа аз фоҷиаи савдои одамон иброз карданд.

28 ноябр Комиссияи байниидоравӣ оид ба муқовимат ба савдои одамон роҳнамои навро муаррифӣ намуд, ки ба беҳтар намудани ҷамъоварӣ ва ҳисоботи маълумот оид ба ҳолатҳои савдои одамон равона шудааст. Ин қадам ба баландшавии самаранокии мониторинг ва таҳлили вазъият, осон кардани ҳамоҳангсозии амалҳо байни сохторҳои давлатӣ ва созмонҳои байналмилалӣ, инчунин ба вуҷуд овардани низоми равшантар барои баррасии ҷиноятҳои алайҳи шахсият мусоидат мекунад.

Дар сафорати ИМА таъкид карданд, ки мубориза бо савдои одамон ба муносибати комплексӣ ниёз дорад, ки мубодилаи иттилоот, омӯзиши кормандони ҳифзи ҳуқуқ ва дастгирии қурбониёнро дар бар мегирад. Роҳнамои нав ба мақомоти давлатӣ имконият медиҳад, ки маълумотро систематикӣ кунанд, амалкарди фавриро баланд бардоранд ва гурӯҳҳои осебпазирро беҳтар ҳифз намоянд.

Барномаи таҳияшуда аз ҷониби Комиссия ба стандартҳои байналмилалӣ мувофиқ буда, ҳамкории Тоҷикистонро бо шарикони байналмилалӣ, аз ҷумла СММ, ташкилоти ҷомеаи шаҳрвандӣ ва сохторҳои ҳифзи ҳуқуқи дигар кишварҳо тақвият мебахшад. ИМА ҳамчунон дар соҳаи таҳияи сиёсати давлатӣ, мониторинг ва баланд бардоштани иқтидори Тоҷикистон барои пешгирӣ аз савдои одамон дастгирӣ мерасонад.

Рӯзи 15 январи соли 2026 дар меҳмонхонаи «Кангурт»-и шаҳри Душанбе ҷаласаи Комиссияи байниидоравӣ баргузор гардид, ки дар он Раиси Комиссия ва муовини якуми Вазири корҳои дохилӣ генерал-полковники милитсия Абдураҳмон Аламшозода, инчунин намояндагони сохторҳои ҳифзи ҳуқуқ ва идораҳои давлатӣ ширкат ва суханронӣ намуданд.

Дар ҷараёни чорабинӣ Абдураҳмон Аламшозода таъкид кард, ки ҳадафи асосии Комиссия ин ҳамкорӣ бо ҷомеа барои муборизаи самаранок бо ҷиноятҳои марбут ба савдои одамон, бартараф кардани монеаҳо ва баланд бардоштани нуфузи давлат мебошад. Дар охири ҷаласа иштирокчиён пешниҳодҳои созанда барои беҳтар намудани фаъолияти Комиссия ва пешрафти минбаъдаро дар самти муқовимат ба савдои одамон ироа карданд.

Ин қадам ҷузъи стратегии васеи ҳифзи ҳуқуқи инсон ва амнияти аҳолӣ буда, ҷавоби устувори ҷомеаи байналмилалиро ба талошҳои муштараки барҳам додани савдои одамон дар минтақа нишон медиҳад.

АКС: Вазорати корҳои дохилии Ҷумҳурии Тоҷикистон