Душанбе, 04 март, – АИ «Корвон Иттилоот». Ба муносибати моҳи шарифи Рамазон, ки моҳи раҳму шафқат ва корҳои хайру савоб мебошад, Шӯрои уламоии Маркази исломии Тоҷикистон ба шаҳрвандон муроҷиат намуда, тартиби анҷоми корҳои хайру садақаро тибқи талаботи шариати исломӣ шарҳ дод.

Дар изҳорот таъкид шудааст, ки бисёре аз аҳли имон дар ин рӯзҳо кӯшиш мекунанд, ки фаъолона дар корҳои хайру писандида ва садақот иштирок кунанд. Аммо ҳар як амал, аз ҷумла хайру садақот, бояд мувофиқи низому одоби шариат анҷом дода шавад.

Шӯрои уламо диққати ҳамватанонро ба амалҳое ҷалб кардааст, ки дар шаҳрҳо мушоҳида мешаванд: баъзе шахсон ҳангоми вақти ифтор маҳсулоти ғизоӣ ва дигар садақоти худро дар роҳҳои сериқтидор ва зери чароғакҳо ба ронандагон ва мусофирон тақсим мекунанд. Гарчанде ин амалҳо бо ниятҳои нек анҷом дода шаванд ҳам, онҳо боиси тамбашавӣ ва таъхири ҳаракати дигар иштирокчиёни роҳ мешаванд. Ҳадя ва савоби чунин садақот бештар мешавад, агар ба ниёзмандон — ятимон, бенавоён ва дармондагон — дода шаванд.

Шӯрои уламо аз шаҳрвандон даъват мекунад, ки хайру садақоти худро бо риё набуда, ба мустаҳқиқони ҳақиқӣ, яъне ниёзмандон ва фақирон пешниҳод намоянд ва ҳамзамон талаботи шариати исломро риоя кунанд.

Чунон ки дар ояти 60-уми сураи «Тавба» омадааст:

“Садақа барои фақирон ва мискинон, барои онҳое, ки ҷамъоварии садақа мекунанд, барои онҳое, ки дилҳояшон бояд ба кори нек мувофиқат ёбад, барои озод кардани бардаҳо, барои қарздорон, барои роҳи Худо ва барои мусофирон аст; ин аз ҷониби Худо муқаррар шудааст ва Ӯ доно ва росткор аст.”

Шӯрои уламо таъкид мекунад, ки хайру садақоти дуруст ва мувофиқ бо шариат арзишҳои маънавӣ ва ахлоқиро тақвият мебахшад, ҳисси раҳмдилӣ ва кӯмак ба ниёзмандонро дар ҷомеа ривоҷ медиҳад ва ба ҳифзи меъёрҳои баланди ахлоқии ислом мусоидат мекунад.

АКС: Маркази исломии Тоҷикистон