Душанбе, 28 январ, – АИ «Корвон Иттилоот». Вилояти Хатлон мавқеи худро ҳамчун яке аз минтақаҳои калидии ҷалби сармоягузорӣ дар соҳаи энергетикаи таҷдидшаванда таҳким мебахшад. Ширкати «Dayu New Energy Limited» ният дорад дар ноҳияҳои Қубодиён ва Ҷайҳун неругоҳҳои офтобӣ ва бодиро бо иқтидори умумии 500 мегаватт бунёд намояд.

Ин масъала зимни мулоқоти раиси вилояти Хатлон Давлаталӣ Саид бо роҳбари ширкати «Dayu New Energy Limited» Давид Лю баррасӣ гардид. Тибқи иттилои маркази матбуоти мақомоти иҷроияи ҳокимияти давлатии вилоят, ҷонибҳо дурнамои ҳамкорӣ ва имкониятҳои сармоягузории минтақаро муҳокима карданд.

Зикр гардид, ки вилояти Хатлон ҳамкории фаъолро бо ширкатҳои Ҷумҳурии Мардумии Чин густариш дода, барои татбиқи лоиҳаҳои бузурги сармоягузорӣ, бахусус дар соҳаи энергетикаи «сабз», дорои иқтидори назаррас мебошад. Шароити табиӣ ва иқлимии минтақа барои истифодаи самараноки энергияи офтоб ва бод мусоид аст.

Давид Лю иброз дошт, ки ширкати «Dayu New Energy Limited» аз соли 2018 инҷониб дар бахши манбаъҳои барқароршавандаи энергия фаъолият намуда, ба сохтмон ва истифодаи неругоҳҳои офтобӣ ва бодӣ ихтисос дорад. Айни замон ширкат лоиҳаҳои ветроэнергетикиро дар Гурҷистон ва Қазоқистон амалӣ месозад.

Раиси вилояти Хатлон таъкид намуд, ки густариши ҳамкорӣ бо ширкатҳои чинӣ яке аз самтҳои афзалиятноки фаъолияти хориҷии иқтисодии минтақа ба шумор меравад. Ӯ аз шарикии дарозмуддат ҷиҳати ҷалби сармоя, ҷорӣ намудани технологияҳои муосир ва истифодаи самараноки иқтидори минтақавӣ изҳори ҳавасмандӣ кард.

Дар анҷоми мулоқот ташаббуси сохтмони неругоҳҳои офтобӣ ва бодӣ дар қаламрави вилоят ҷонибдорӣ гардид.

АКС: Мақомоти иҷроияи ҳокимияти давлатии вилояти Хатлон