Душанбе, 16 январ, – АИ «Корвон Иттилоот». Тоҷикистон боз як қадами муҳими стратегиро дар самти рушди энергетикаи «сабз» мегузорад. Дар ҷумҳурӣ сохтмони неругоҳи офтобии иқтидораш 400 мегаватт ба нақша гирифта шудааст, ки метавонад тавозуни энергетикии кишварро ба таври назаррас тақвият бахшида, манбаъҳои истеҳсоли неруи барқро гуногун созад.

Масъалаҳои татбиқи ин лоиҳа 14 январ зимни мулоқоти муовини вазири энергетика ва захираҳои оби Ҷумҳурии Тоҷикистон Манучеҳр Сафарзода бо роҳбарияти ширкати аморатии Masdar баррасӣ гардиданд. Вохӯрӣ дар доираи «Ҳафтаи рушди устувори Абузабӣ – 2026», ки аз 11 то 15 январ дар Амороти Муттаҳидаи Араб баргузор мегардад, сурат гирифт.

Ҷонибҳо ба дурнамои густариши ҳамкории дуҷониба дар соҳаи манбаъҳои барқароршавандаи энергия таваҷҷуҳи хос зоҳир намуданд. Таъкид шуд, ки амалишавии неругоҳи офтобии 400 МВт ба афзоиши иқтидорҳои истеҳсолии энергетикаи «сабз», таҳкими устувории низоми энергетикии миллӣ ва коҳиши вобастагӣ аз омилҳои мавсимии гидроэнергетика мусоидат хоҳад кард.

Ин лоиҳа ҳамчун ҷузъи стратегии дарозмуддати гузариш ба модели мутавозин ва аз ҷиҳати экологӣ тоза арзёбӣ мегардад. Истифодаи иқтидори офтобии кишвар имконият фароҳам меорад, ки ҳам таъминоти дохилии неруи барқ тақвият ёбад ва ҳам сармоягузориҳои байналмилалӣ ҷалб карда шаванд.

Манучеҳр Сафарзода омодагии Тоҷикистонро ҷиҳати фароҳам овардани муҳити мусоиди сармоягузорӣ ва дастгирии ҳамаҷонибаи лоиҳаҳои энергетикаи барқароршаванда таъкид намуд. Ба гуфтаи ӯ, рушди энергетикаи офтобӣ ба афзалиятҳои сиёсати давлатии энергетикӣ ва уҳдадориҳои байналмилалии кишвар дар самти рушди устувор мувофиқат мекунад.

Дар назар аст, ки татбиқи ин лоиҳа бо иштироки Masdar марҳалаи муҳим дар ташаккули инфрасохтори муосири энергетикии Тоҷикистон гардад.

АКС: Вазорати энергетика ва захираҳои оби Ҷумҳурии Тоҷикистон