Душанбе, 10 январ, – АИ «Корвон Иттилоот». Шаби 9 январ, соати 02:14 ба вақти маҳаллӣ, дар қаламрави Вилояти Мухтори Кӯҳистони Бадахшон зилзила ба қайд гирифта шуд. Дар ин бора Хадамоти геофизикии Академияи илмҳои Ҷумҳурии Тоҷикистон иттилоъ дод.

Тибқи маълумоти расмӣ, маркази зилзила дар 61 километр дуртар аз ноҳияи Мурғоб ҷойгир буда, қувваи ларзишҳо дар маркази он 5,3 балл-ро ташкил додааст. Дар бораи он ки ларзишҳо дар дигар минтақаҳои кишвар бо чӣ шиддат эҳсос шудаанд, мутахассисони соҳаи зилзиласанҷӣ ҳанӯз иттилои расмӣ надодаанд.

Бо вуҷуди дур будани маркази зилзила, сокинони шаҳри Душанбе дар шабакаҳои иҷтимоӣ хабар доданд, ки ларзишҳои зеризаминӣ, ки чанд сония идома доштанд, эҳсос гардиданд. Дар айни ҳол маълумоти расмӣ дар бораи шиддати ларзишҳо дар пойтахт пешниҳод нашудааст.

То ин дам маълумоте дар бораи вайроншавӣ ё осеб дидани аҳолӣ ворид нашудааст. Хадамоти масъул вазъиятро таҳти назорат қарор дода, пайомадҳои эҳтимолии зилзиларо, бахусус дар минтақаҳои кӯҳии дастнорас, мавриди санҷиш қарор медиҳанд.

Ин ҳодиса бори дигар аз сатҳи баланди фаъолиятҳои сейсмикӣ дар Тоҷикистон ёдрас шуд. Аз ҷумла, 13 апрели соли гузашта дар шимолу шарқи кишвар зилзилаи қуввааш 5–6 балл рух дода буд, ки дар натиҷаи он дар ноҳияҳои Рашт ва Тоҷикобод 94 хонаи истиқоматӣ пурра хароб гардида, даҳҳо иншооти дигар қисман осеб дида буданд.

Мутахассисон таъкид мекунанд, ки дар шароити релефи кӯҳӣ ва минтақаҳои фаъоли тектоникӣ мониторинги доимии вазъи сейсмикӣ ва омодагии инфрасохтор аз омилҳои калидии амният ба шумор мераванд.

Акс: ozodi.org