Душанбе, 08 апрел, – АИ «Корвон Иттилоот». Дар пойтахти Тоҷикистон оғози расмии сеюмин Фестивал-намоишгоҳи байналмилалии донишгоҳҳои хориҷӣ — 2026 баргузор гардид, ки имрӯз он аз доираи як форуми маъмулии таълимӣ фаротар рафта, ба платформаи стратегии ҳамгироии кишвар ба фазои ҷаҳонии илм ва маориф табдил меёбад.

Маросими ифтитоҳ дар Китобхонаи миллии Тоҷикистон 06 апрел  баргузор гардида, намояндагони Ҳукумат, корпуси дипломатӣ, донишгоҳҳои пешсаф ва ҳазорон ҷавононро гирд овард. Тавре аз маркази матбуоти Вазорати маориф ва илми ҷумҳурӣ хабар доданд, ин фестивал идомаи равандҳои устувори густариши ҳамкориҳои байналмилалӣ ва навсозии низоми маориф мебошад.

Муовини Сарвазири Ҷумҳурии Тоҷикистон Дилрабо Мансурӣ зимни суханронӣ таъкид намуд, ки баргузории чунин чорабинӣ нишонаи марҳилаи нави рушди ҳамкориҳои гуногунҷанба дар соҳаи илм ва маориф мебошад. Ба гуфтаи ӯ, дар муддати кӯтоҳ фестивал ба як платформаи нодири байналмилалӣ табдил ёфтааст, ки дар он равишҳои нави рушди маориф шакл мегиранд, робитаҳои илмӣ тақвият меёбанд ва таҷрибаи пешқадам мубодила мешавад.

Дар суханронӣ инчунин ба чолишҳои ҷаҳонишавӣ диққати махсус дода шуд. Дар шароити тағйироти босуръати технологӣ, маҳз ҳамгироии илм, маориф ва инноватсия заминаи асосии рушди устувор мебошад. Чунин платформаҳо имкон медиҳанд, ки низоми миллии маориф ба стандартҳои байналмилалӣ мутобиқ гардонида шуда, бартариҳои дарозмуддати иқтисодӣ таъмин шаванд.

Вазири маориф ва илми Ҷумҳурии Тоҷикистон Раҳим Саидзода низ ба хусусияти системавии ислоҳот ишора намуда, зикр кард, ки ба шарофати сиёсати хирадмандонаи Президенти Ҷумҳурии Тоҷикистон муҳтарам Эмомалӣ Раҳмон соҳаи маориф ва илм ҳамчун самти афзалиятноки сиёсати давлатӣ муайян гардидааст. Ин раванд барои омодасозии мутахассисони рақобатпазир заминаи устувор фароҳам меорад.

Таъкид гардид, ки фестивал якчанд вазифаи калидиро иҷро менамояд: аз муаррифии имкониятҳои таҳсил дар донишгоҳҳои хориҷӣ то барқарор намудани робитаҳои мустақими ҳамкорӣ. Сухан на танҳо дар бораи ҳаракати донишҷӯён, балки дар бораи роҳандозии барномаҳои дипломи дугона, таъсиси факултетҳои муштарак ва татбиқи лоиҳаҳои илмӣ меравад.

Аҳамияти чунин ташаббусҳо аз доираи соҳаи маориф фаротар буда, эътирофи байналмилалии сифати таҳсилот ба нишондиҳандаи мавқеи кишвар дар арсаи ҷаҳонӣ табдил меёбад. Сармояи инсонӣ бошад, ҳамчун омили асосии рушди устувор баромад мекунад.

Дар доираи чорабинӣ намояндагони корпуси дипломатӣ ва ҷомеаи академӣ аҳамияти фестивалро ҳамчун воситаи таҳкими ҳамкориҳои байналмилалӣ ва ташаккули фазои ягонаи таҳсилоти олӣ баланд арзёбӣ карданд.

Қисмати амалии форум дар маркази «Экспо-Душанбе» идома ёфт, ки дар он намоишгоҳи густурдаи донишгоҳҳои хориҷӣ баргузор гардид. Зиёда аз 10 ҳазор хонандагони мактабҳои шаҳри Душанбе бо барномаҳои таълимӣ, шартҳои қабул ва пешниҳодҳои стипендиявии донишгоҳҳои кишварҳои гуногун шинос шуданд.

Ҳамзамон, дар доираи фестивал конфронси мавзӯии «Сифати таҳсилот ва мутобиқшавӣ ба стандартҳои байналмилалӣ» баргузор гардид, ки дар он масъалаҳои муҳими рушди таҳсилоти олӣ, аз ҷумла рақамисозӣ ва ҳамоҳангсозии стандартҳо мавриди баррасӣ қарор гирифтанд.

Фестивал аз 6 то 10 апрел дар шаҳрҳои Душанбе, Хуҷанд ва ноҳияи Данғара баргузор гардида, хусусияти фарогири миллӣ дорад. Он ба густариши имкониятҳои таҳсил барои ҷавонон ва таҳкими робитаҳои илмии Тоҷикистон бо ҷомеаи ҷаҳонӣ мусоидат мекунад.

Дар шароити рақобати ҷаҳонӣ барои дониш ва технология, чунин майдонҳо на танҳо чорабинӣ, балки унсури муҳими стратегияи оянда мебошанд, ки бар пояи зеҳн, ҳамкорӣ ва кушодагӣ бунёд мегарданд.

АКС: маркази матбуоти Вазорати маориф ва илми Ҷумҳурии Тоҷикистон