Душанбе, 15 январ, – АИ «Корвон Иттилоот». Дар Тоҷикистон марҳилаи нави рушди стратегии саноат оғоз мегардад. То поёни семоҳаи якуми соли ҷорӣ лоиҳаи Барномаи нави саноатикунонии босуръати Ҷумҳурии Тоҷикистон барои солҳои 2026–2030 таҳия шуда, ба Ҳукумати мамлакат пешниҳод мегардад. Дар ин бора Вазорати саноат ва технологияҳои нави кишвар иттилоъ медиҳад.
Ҳамзамон қабули Барномаи рушди истеҳсол ва ғанигардонии металлҳои ранга, нодир ва қиматбаҳо, инчунин дигар ашёи хоми стратегӣ дар назар аст. Ҳадафи ин санадҳо истифодаи оқилонаи захираҳои зеризаминӣ, тақвияти назорати давлатӣ ва фароҳам овардани замина барои рушди устувори соҳаҳои истихроҷ ва геология мебошад.
Дар таҳияи заминаи меъёрии ҳуқуқӣ вазорату идораҳои калидӣ, аз ҷумла Вазорати молия, Вазорати саноат ва технологияҳои нав, Саридораи геология ва Кумитаи андоз иштирок доранд. Тибқи дастуру супоришҳои Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон, дар санадҳои нав бояд масъалаҳои фарогирии пурраи оморӣ, соддагардонии расмиёти давлатӣ, такмили низоми андозбандии захираҳои табиӣ ва ҳалли мушкилоти соҳа инъикос ёбанд.
Дар Паёми Президенти мамлакат ба Маҷлиси Олӣ 16 декабри соли 2025 таъкид гардид, ки дар солҳои 2019–2025 беш аз 2600 корхонаи саноатӣ бо таъсиси зиёда аз 87 ҳазор ҷойи корӣ ба истифода дода шудааст. Танҳо дар соли 2025 фаъолияти 400 корхонаи нав оғоз гардид.
Дар ҳамин давра ҳаҷми истеҳсол дар соҳаи маъдан аз 7,7 миллиард сомонӣ то 26 миллиард сомонӣ афзоиш ёфта, шумораи намудҳои маҳсулот аз 3 то 17 номгӯй расид. Ҳаҷми умумии истеҳсоли саноатӣ дар соли 2025 ба 66 миллиард сомонӣ баробар шуда, суръати рушд 22 фоизро ташкил дод.
Дар марҳилаи нав бо ҷалби сармояи дохилӣ ва хориҷӣ рушди солонаи соҳа на кам аз 25 фоиз пешбинӣ гардида, таъсиси корхонаҳои коркарди амиқи ашёи хом ва афзоиши маҳсулоти содиротӣ ва ивазкунандаи воридот ҳамчун афзалият муайян шудааст.
АКС: e-cis.info