Душанбе, 18 февраля 2026г. — ИА Караван Инфо. Дар бахши энергетикии Тоҷикистон як парвандаи пурсарусадо рӯйи об баромад, ки метавонад ба низоми молиявии соҳа ва сатҳи эътимоди ҷомеа ба таъминоти барқ таъсири ҷиддӣ расонад. Прокуратураи генералӣ аз ошкор шудани қонуншиканиҳои густурда, вобаста ба азхудкунии маблағҳои ҷамъоваришуда аз аҳолӣ барои истифодаи неруи барқ, хабар дод.

Прокурори генералии Ҷумҳурии Тоҷикистон Хабибулло Вохидзода 13 феврал зимни нишасти матбуотӣ изҳор дошт, ки дар соҳаи таъминоти барқ қонуншиканиҳои ҷиддӣ ошкор гардиданд. Ба гуфтаи ӯ, баъзе кормандони шабакаҳои барқ маблағҳои аз аҳолӣ ҷамъоваришударо ба суратҳисоби давлатӣ дар шакли ғайринақдӣ нагузаронида, онҳоро нигоҳ дошта, аз худ мекарданд.

Дар яке аз ҳолатҳои ошкоршуда дар суратҳисоби бонкии як нозири барқ 9 миллион сомонӣ пайдо гардид, ки аз истеъмолкунандагон ҳамчун ҳаққи истифодаи неруи барқ гирифта шуда буд.

Тибқи натиҷаҳои санҷишҳо, ки соли гузашта аз ҷониби мақомоти прокуратура анҷом дода шуданд, ҳолатҳои зиёди азхудкунии маблағҳои буҷетӣ ва соҳавӣ, ҳисобкунии нодурусти маблағҳо, вайронкуниҳо дар низоми биллинг ва дигар қонуншиканиҳо муайян гардиданд.

Ба гуфтаи прокурори генералӣ, дар натиҷаи дахолати прокуратура беш аз 365 миллион сомонӣ ба фоидаи давлат баргардонида шуд.

Дар давоми соли гузашта 4 ҳазору 972 нафар барои истифодаи ғайриқонунии неруи барқ ба ҷавобгарии ҷиноятӣ ва маъмурӣ кашида шуданд.

Муовини прокурори генералӣ Сарвар Азимзода иттилоъ дод, ки нисбат ба 23 роҳбари шабакаҳои таъминоти барқ ва 120 нозири барқ парвандаҳои ҷиноятӣ оғоз карда шуданд.

Қаблан намояндаи ширкати «Сети распределения электроэнергии» хабар дода буд, ки дар соли 2025 вобаста ба камбудиҳои ошкоршуда 125 корманди шабакаҳои барқ ба ҷавобгарии ҷиноятӣ кашида шуда, аз вазифа озод гардиданд.

Дар Агентии назорати соҳаи энергетика низ иттилоъ доданд, ки соли гузашта 406 корманди идораҳои таъминоти барқ ба маблағи умумии 293 ҳазор сомонӣ ҷарима шуданд. Аз ин шумора:

• 375 нафар кормандони Шабакаҳои тақсимоти нерӯи барқ;
• 12 нафар кормандони Шабакаҳои интиқоли нерӯи барқ;
• 9 нафар кормандони Барки точик;
• 10 нафар намояндагони Памирэнерджи мебошанд.

Онҳо тибқи моддаҳои 394 ва 397 Кодекси ҳуқуқвайронкунии маъмурӣ — барои риоя накардани қоидаҳои истифодаи захираҳои энергетикӣ ва таҷҳизоти барқию гармӣ — ҷарима шуданд.

Мубориза бо истифодаи ғайриқонунии неруи барқ пас аз сахттар шудани чораҳои ҷавобгарӣ оғоз гардид. Тибқи Кодекси ҷиноятии Ҷумҳурии Тоҷикистон, шахсоне, ки қоидаҳои истифодаи неруи барқро вайрон мекунанд ё аз пардохти он сарпечӣ менамоянд, бо ҷарима аз 27 ҳазор то 90 ҳазор сомонӣ ё маҳрум сохтан аз озодӣ ба муҳлати аз 3 то 10 сол ҷазо дода мешаванд.

Бозгардонидани беш аз 365 миллион сомонӣ ба буҷети давлат нишон медиҳад, ки сухан аз мушкили ҷиддии низомӣ меравад. Энергетика яке аз бахшҳои калидии иқтисоди миллӣ буда, сатҳи шаффофият дар он ба суботи иҷтимоӣ бевосита таъсир мерасонад.

Бо таваҷҷуҳ ба мавсимияти норасоии барқ ва аҳамияти иҷтимоии соҳа, мубориза бо фасод ва азхудкунӣ дар энергетика ба марҳилаи нав ворид шудааст — бо ҷалби на танҳо қонуншиканони оддӣ, балки роҳбарони соҳа низ ба ҷавобгарӣ.

АКС: https://pressa.tj/