Душанбе, 19 сентябр, – АИ «Корвон Иттилоот». Раиси Шӯрои уламоии Тоҷикистон Саидмукаррам Абдуқодирзода бо Медали фахрии Анҷумани VIII роҳбарони динҳои ҷаҳонӣ ва суннатӣ сарфароз гардонида шуд.

Ин ҷоиза бар асоси фармони Президенти Ҷумҳурии Қазоқистон Қосим-Жомарт Тоқаев дар маросими тантанавӣ дар шаҳри Остона супорида шуд. Медали фахрӣ ба шахсиятҳои барҷастаи динӣ ва намояндагони созмонҳои байналмилалӣ дода мешавад, ки дар таҳкими муколама, ҳамдигарфаҳмӣ ва сулҳ миёни халқҳо саҳми назаррас доранд.

Саидмукаррам Абдуқодирзода, ки Шӯрои уламои Тоҷикистонро роҳбарӣ мекунад ва яке аз шахсиятҳои нуфузманди динӣ дар Осиёи Марказӣ ба шумор меравад, дар кори Анҷумани VIII ширкат дорад, ки 17 сентябр оғоз гардидааст.

Имсол форум зиёда аз 700 вакил аз 60 кишвари ҷаҳон — роҳбарони динҳои ҷаҳонӣ, намояндагони ташкилотҳои байналмилалӣ ва муассисаҳои ҷамъиятиро гирд овардааст. Мавзӯи марказии баҳсҳо нақши динҳои суннатӣ дар пешбурди арзишҳои сулҳ, ҳамдигарфаҳмӣ ва амнияти ҷаҳонӣ мебошад.

Ширкат ва қадршиносии муфтии Тоҷикистон нақши рӯзафзуни кишварро дар муколамаи байналмилалии байнидинӣ ва саҳми онро дар густариши арзишҳои таҳаммулпазирӣ ва ҳамкорӣ таъкид мекунад.

АКС:  Kazpravda kz