Душанбе, 16 март, – АИ «Корвон Иттилоот». Шаби Қадр — Лайлат аль-Кадр, ки муҳимтарин шаби моҳи мубораки Рамазон ба шумор меравад, имсол дар Тоҷикистон шаби 16 ба 17 март фаро мерасад. Дар ин бора раиси Шӯрои уламои Тоҷикистон, муфтии кишвар Саидмукаррам Абдулқодирзода хабар дод.

Ба гуфтаи муфтии мамлакат, ин шаб ба шаби 26 ба 27-уми моҳи Рамазон рост меояд ва дар дили мусалмонон ҷойгоҳи махсус дорад. Барои мӯъминон ин шаб беҳтарин фурсат барои ибодат, дуо, тавба ва анҷом додани корҳои хайр маҳсуб мешавад.

Тибқи таълимоти исломӣ, маҳз дар Шаби Қадр ба паёмбар Муҳаммад (с) аввалин оятҳои Қуръони карим нозил гардидаанд. Тавре дар сомонаи расмии Шӯрои уламои Тоҷикистон омадааст, ин шаб лаҳзаест, ки робитаи мустақим миёни осмон ва замин, инчунин миёни инсоният ва олами фариштагон барқарор гардида, нузули оятҳои Қуръон ба дили поки Паёмбар оғоз ёфтааст.

Уламо таъкид мекунанд, ки дар сураи АлҚадр чанд хусусияти муҳими ин шаб зикр шудааст:

• дар ҳамин шаб нузули Қуръони карим оғоз гардидааст;
• ин шаб беҳтар аз ҳазор моҳ мебошад;
• дар ин шаб фариштагон бо сарварии фариштаи Ҷабраил ба замин нозил мешаванд ва амрҳои Худовандро иҷро мекунанд;
• то субҳ тамоми ҷаҳон пур аз баракат, амният, оромӣ ва раҳмати илоҳӣ мегардад.

Дар ин шаб мусалмонон кӯшиш мекунанд вақти бештарро ба ибодат бахшанд: Қуръон мехонанд, намозҳои иловагӣ, аз ҷумла намози шаб — таҳаҷҷуд адо менамоянд ва бо дуо ба даргоҳи Худованд муроҷиат мекунанд. Бисёре аз мӯъминон шабро то саҳар бедор монда, ба ибодат, зикр ва тафаккури рӯҳонӣ машғул мешаванд.

Намояндагони Шӯрои уламои Тоҷикистон ҳамчунин таъкид мекунанд, ки мувофиқи ривоятҳои исломӣ, Шаби Қадр аз дигар шабҳо бо оромиву осоиштагӣ фарқ мекунад: ҳаво мулоим ва бе шамоли сахт буда, қалбҳои мӯъминон аз эҳсоси сулҳ, оромӣ ва хушнудии рӯҳонӣ пур мегарданд.

Аксари донишмандони ислом бар ин назаранд, ки санаи дақиқи Шаби Қадр пинҳон дошта шудааст ва он метавонад ба яке аз шабҳои тоқ дар даҳаи охири моҳи Рамазон рост ояд. Бо вуҷуди ин, дар бисёр кишварҳои мусалмонӣ одатан шаби 27-уми Рамазон ҳамчун Шаби Қадр бештар гиромӣ дошта мешавад.

Соли гузашта ин шаб ба шаби 26 ба 27 март рост омада буд, яъне низ ба рӯзи 27-уми моҳи мубораки Рамазон.

Акс: m.xabar.uz