Душанбе, 10 январ, – АИ «Корвон Иттилоот». Сафири Ҷумҳурии Тоҷикистон дар Федератсияи Русия Давлатшох Гулмахмадзода бо донишҷӯёни тоҷик, ки дар муассисаҳои таҳсилоти олии Русия таҳсил мекунанд, вохӯрӣ анҷом дод. Дар ин бора сомонаи расмии Сафорати Ҷумҳурии Тоҷикистон дар ФР хабар медиҳад.

Зимни мулоқот роҳбари намояндагии дипломатӣ нуктаҳои асосии Паёми Президенти Ҷумҳурии Тоҷикистон Эмомалӣ Раҳмон «Дар бораи самтҳои асосии сиёсати дохилӣ ва хориҷӣ»-ро ба таври муфассал шарҳ дода, ба афзалиятҳои сиёсати давлатӣ дар шароити кунунӣ таваҷҷуҳи хос зоҳир намуд.

Дар суханронии худ Давлатшох Гулмахмадзода таъкид кард, ки аз ҷумлаи самтҳои афзалиятноки сиёсати давлатии Тоҷикистон таъмини сатҳи шоистаи зиндагии аҳолӣ, кафолати амният ва волоияти қонун, ҳифзи сулҳу субот, рушди маориф, фарҳанг ва соҳаи тандурустӣ маҳсуб меёбанд. Ҳамзамон ба масъалаи дастгирии занон ва ҷавонон ва пешбарии онҳо ба вазифаҳои роҳбарикунанда диққати махсус дода шуд.

Сафир нақши ҷавононро дар рушди иҷтимоию иқтисодии кишвар махсус таъкид намуда, зикр кард, ки ихтисосҳое, ки донишҷӯёни тоҷик дар хориҷ аз кишвар аз худ мекунанд, дар Тоҷикистон талабот доранд ва дониш ва малакаҳои гирифтаи онҳо метавонанд ба ояндаи ҷумҳурӣ саҳми назаррас гузоранд. Дар ин замина, ӯ донишҷӯёнро даъват намуд, ки аз имкониятҳои донишгоҳҳои Русия самаранок истифода бурда, сатҳи касбии худро баланд бардоранд ва забонҳои хориҷиро фаъолона омӯзанд.

Қисми муҳими мулоқот ба масъалаҳои арзишҳо ва масъулияти шаҳрвандӣ бахшида шуд. Сафир донишҷӯёнро ба риояи қатъии анъанаҳо ва арзишҳои миллӣ, тарбияи ҳисси ватандӯстӣ ва ҳушёрӣ дар баробари иғвоангезиҳо даъват кард. Ҳамчунин зарурати пешгирии ҷалби ҷавонон ба созмонҳои ифротгаро ва террористӣ ва муқовимати фаъол ба ғояҳои радикалӣ таъкид гардид.

Давлатшох Гулмахмадзода ҳамчунин ба аҳамияти эҳтироми фарҳанг ва суннатҳои кишвари иқомат ва риояи бечунучарои қонунгузории Федератсияи Русия ишора карда, таъкид намуд, ки маҳз чунин рафтор симои мусбати шаҳрвандони Тоҷикистонро дар хориҷ ташаккул медиҳад.

Бояд зикр кард, ки қаблан сафири Тоҷикистон дар Русия бо шаҳрвандони ҷумҳурӣ дар фурудгоҳҳои Домодедово ва Шереметево мулоқот анҷом дода буд. Дар ҷараёни ин вохӯриҳо масъалаҳои ҳифзи ҳуқуқи шаҳрвандони Тоҷикистон дар қаламрави Русия ва ҳамчунин ташкили бозгашти саривақтии онҳо ба Ватан баррасӣ шуданд.

Дипломат ба аҳамияти риояи қонунгузории Русия, эҳтиром ба фарҳанг ва арзишҳои он, пешгирии ҳодисаҳои ҷиноятӣ дар миёни шаҳрвандон, мубориза бо ифротгароӣ ва радикализатсияи ҷавонон, инчунин истифодаи самараноки шабакаҳои иҷтимоӣ ҷиҳати баланд бардоштани масъулияти шаҳрвандӣ таъкид намуд.

Акс: Сафорати Ҷумҳурии Тоҷикистон дар ФР