Душанбе, 14 январ, – АИ «Корвон Иттилоот». Раиси Маҷлиси намояндагони Маҷлиси Олии Ҷумҳурии Тоҷикистон Файзалӣ Идизода бо Сафири Фавқулода ва Мухтори Ҷумҳурии Мардумии Чин дар Тоҷикистон Го Чжизюн вохӯрӣ анҷом дод, иттилоъ додааст хадамоти матбуоти парламент.

Дар ҷараёни вохӯрӣ тарафҳо таъкид намуданд, ки аз замони барқарор гардидани муносибатҳои дипломатӣ байни кишварҳо соли 1992 то имрӯз равобити дуҷониба ба марҳилаи нав баромада, аз сатҳи муносибатҳои муқаррарӣ ба сатҳи шарикии стратегӣ ва ҳамкории иттифоқӣ расидааст. Ҳоло муносибатҳои Тоҷикистону Чин бар асоси зиёда аз 250 санади байналмилалии дуҷониба асос ёфта, самаранокии талошҳои дипломатии ҷонибҳоро исбот менамоянд.

Файзалӣ Идизода таъкид намуд, ки дастовардҳои бадастомада дар муносибатҳои дуҷониба бо шарофати муносибатҳои дӯстона, иродаи сиёсӣ ва ташаббусҳои Сарони давлатҳо — Президенти Ҷумҳурии Тоҷикистон муҳтарам Эмомалӣ Раҳмон ва Раиси Ҷумҳурии Мардумии Чин муҳтарам Си Ҷинпин амалӣ гардидаанд.

Дар доираи мулоқот ҷалби устувор ва доимии робитаҳои байнипарламентӣ оид ба масъалаҳои муҳими рӯзномаи байналмилалӣ баҳо дода шуд. Ҷонибҳо масоили таҳкими сулҳ, амният ва суботро дар доираи фаъолияти Созмони Милали Муттаҳид, Созмони ҳамкории Шанхай ва дигар созмонҳои байналмилалӣ баррасӣ намуданд.

Ҳамчунин, тарафҳо фаъолияти самарабахш ва натиҷабахши ҳамкории байнипарламентиро, ки соли 2005 оғоз ёфтааст, мусбат арзёбӣ карданд ва барои густариши минбаъдаи робитаҳо изҳори ҳавасмандӣ намуданд. Таъкид шуд, ки рушди муносибатҳои Тоҷикистону Чин дар соҳаҳои савдо, гуманитарӣ, фарҳангӣ, маориф, мудофиа, амният ва мубодилаи таҷриба дар бахшҳои гуногуни иқтисоди миллӣ аҳамияти хос дорад.

Зикр гардид, ки пешрафти муносибатҳои стратегии дуҷониба ба фаъолияти парламентҳои ҳарду кишвар, густариши робитаҳо ва тасдиқи санадҳои байналмилалӣ сахт вобаста мебошад. Дар ин замина, Маҷлиси намояндагон нақши муҳим дар таъмин намудани рушди ҳамкории дуҷониба мебозад.

АКС: Маҷлиси намояндагони Маҷлиси Олии Ҷумҳурии Тоҷикистон