Душанбе, 10 апрел, – АИ «Корвон Иттилоот». Дар шароити афзоиши аҳамияти «қувваи нарм» ва дипломатияи фарҳангӣ Тоҷикистон ҳузури гуманитарии худро дар сатҳи байналмилалӣ пайгирона тақвият мебахшад. Далели навбатии ин раванд таҷлили бошукӯҳи Иди байналмилалии Наврӯз мебошад, ки 7 апрел дар қароргоҳи ЮНЕСКО дар шаҳри Париж баргузор гардид.

Чорабинӣ таҳти ҳамоҳангсозии Намояндагии доимии Ҷумҳурии Тоҷикистон дар назди ЮНЕСКО ва бо иштироки кишварҳои ҳавзаи Наврӯз доир шуда, ба як майдони муҳими муколамаи фарҳангӣ табдил ёфт. Дар он намояндагони давлатҳои аъзои созмон, кормандони котибот ва шаҳрвандони кишварҳои дорои анъанаҳои Наврӯз, аз ҷумла тоҷикони муқими Фаронса ва дигар кишварҳои Аврупо иштирок намуданд.

Намояндаи доимии Тоҷикистон дар назди ЮНЕСКО Дилшод Раҳимӣ ҳозиринро табрик намуда, аҳамияти таърихӣ ва фарҳангии Наврӯзро таъкид кард. Ба гуфтаи ӯ, ин ҷашн рамзи ваҳдат, эҳёи табиат ва пайванди тамаддунҳо мебошад.

Дар доираи намоиши дастархонҳои идона гӯшаи Тоҷикистон бо таомҳои миллӣ ва ҳунарҳои мардумӣ оро дода шуда буд. Меҳмонон бо намунаҳои санъати амалии халқӣ шинос гардиданд.

Барномаи фарҳангӣ бо навоҳои карнай ва доира баргузор гардида, ҳамчунин намоиши либосҳои миллӣ — чакан, гулдӯзӣ, атлас ва адрас пешкаш гардид, ки онҳо рамзи ҳувияти миллӣ мебошанд.

Дар маҷмӯъ, таҷлили Наврӯз дар майдони ЮНЕСКО танҳо як чорабинии фарҳангӣ набуда, балки василаи муҳими дипломатияи гуманитарӣ мебошад, ки ба таҳкими муколамаи фарҳангҳо ва боло бурдани обрӯи кишвар мусоидат мекунад.

Барои Тоҷикистон, ки дар самти ҳифзи мероси ғайримоддии фарҳангӣ фаъолона иқдом менамояд, чунин чорабиниҳо ҷузъи сиёсати муаррифии кишвар ҳамчун яке аз марказҳои асосии Наврӯз дар ҷаҳон маҳсуб меёбанд.

Акс: Намояндагии доимии Ҷумҳурии Тоҷикистон дар назди ЮНЕСКО