Душанбе, 30 январ, – АИ «Корвон Иттилоот». Дар соли 2025 дар корхонаҳои зери назорати давлатӣ 46 ҳодисаи нохуш ва як садамаи истеҳсолӣ ба қайд гирифта шуд. Дар натиҷаи онҳо 40 нафар ба ҳалокат расида, 27 нафар ҷароҳат бардоштанд. Ин маълумот 27 январ дар нишасти матбуотӣ дар Душанбе аз ҷониби сардори Хадамоти назорати давлатии бехатарии корҳои саноатӣ ва кӯҳкории назди Ҳукумати Ҷумҳурии Тоҷикистон Санъат Раҳим ироа гардид.

Ба гуфтаи ӯ, таҳлили ҳодисаҳо нишон медиҳад, ки сабабҳо асосан хусусияти низомӣ доранд. Аз ҷумла, беҷавобгарии кормандони муҳандисию техникӣ дар ҷойи ҳодиса, беэҳтиётии кормандон ҳангоми кор бо таҷҳизоти хатарнок, риоя накардани қоидаҳои бехатарии саноатӣ ва вайрон намудани технологияҳои коркарди конҳо аз омилҳои асосӣ ба шумор мераванд. Камбуди мутахассисони соҳибтаҷриба низ таъсири ҷиддӣ расондааст.

Дар натиҷаи таҳқиқот 40 шахси ҳуқуқӣ, мансабдор ва воқеӣ ба ҷавобгарии маъмурӣ ҷалб гардида, маблағи умумии ҷаримаҳо 211 ҳазору 500 сомониро ташкил дод.

Ҳамзамон, бо мақсади ҳифзи иҷтимоии зарардидагон ва оилаҳои онҳо, аз ҷониби корхонаҳо, иттифоқҳои касаба ва шахсони воқеӣ ба 67 нафар зарардида, аз ҷумла ба оилаҳои 40 нафар фавтида, тибқи Кодекси меҳнати Ҷумҳурии Тоҷикистон кумакҳои яквақта ва дастгирии моддиву молиявӣ ба маблағи умумии 7 миллиону 852 ҳазору 525 сомонӣ расонида шуд.

Ин омор бори дигар зарурати тақвияти воқеии фарҳанги бехатарии истеҳсолӣ ва масъулияти шахсиро дар ҳамаи зинаҳои фаъолият таъкид мекунад.

АКС: АМТ “ХОВАР”