Душанбе, 19 сентябр, – АИ «Корвон Иттилоот». Сафарбарии дастаи «Истиқлол»-и Душанбе дар Лигаи дуюми қаҳрамонони Осиё бо имтиҳони сангин оғоз ёфт – бозии меҳмонӣ бар зидди яке аз довталабони асосӣ барои унвон, дастаи «Ан-Наср»-и Арабистони Саудӣ. Бозӣ дар Эр-Риёз бо ҳисоби вазнини 0:5 анҷом ёфт, вале барои қаҳрамони Тоҷикистон ин шикаст на охир, балки дарс ва даъват ба муборизаи оянда гардид.
То лаҳзаи охир саволи асосӣ ин буд: оё Криштиану Роналду ба майдон мебарояд? Дар натиҷа, мураббиёни «Ан-Наср» қарор доданд, ки ситораи португалиро аз ин бозӣ берун гузоранд, ва «Истиқлол» бе рӯбарӯӣ бо афсонаи футболи ҷаҳонӣ ба майдон баромад. Капитани даста Ахтам Назаров таъкид карда буд: «Ҳариф мо пур аз ситораҳост, вале мо барои ҳар тӯб меҷангем».
Талоши бозигарони тоҷик барои боздоштани ҳамлаҳои соҳибхона аз аввал душвор буд. Дар дақиқаи 14-ум Гариб ҳисобро боз кард, ва пас аз се дақиқа Анҷело бартариро дукарата намуд. Дар қисми дуюм фишори доимии саудиҳо муҳофизати «Истиқлол»-ро шикаст: Уэсли ҳисобро то 3:0 бурд, ва дар дақиқаҳои охир Коман ва Мане нуқтаи ниҳоиро гузоштанд – 5:0.
Дарвозабон Стошич чанд маротиба дастаашро наҷот дод, вале маҷрои ҳамлаҳои «Ан-Наср» хеле пурзӯр буд.
Дар гурӯҳи D, ғайр аз «Истиқлол» ва «Ан-Наср», инчунин «Ал-Завроа»-и Ироқ ва «Гоа»-и Ҳинд бозӣ мекунанд. Муттахассисон мутмаинанд, ки ҷойи аввалро қариб яқинан саудиҳо мегиранд. Вале мубориза барои ҷойи дуюм сахт хоҳад шуд ва маҳз дар ҳамин мавқеъ имкониятҳои воқеии «Истиқлол» вуҷуд доранд.
Бо вуҷуди шикасти калон, бозӣ дар чунин сатҳ барои футболи Тоҷикистон қадами бузург аст. Рӯбарӯ шудан бо рақибони ситорадор дастаи тоҷикро обутоб медиҳад ва ҷойгоҳи кишварро дар харитаи футболи Осиё мустаҳкам месозад.
Таърих ёдгор дорад, ки «Истиқлол» аллакай ғалабаҳои сенсатсионӣ ба даст овардааст. Аз ҳамин рӯ, мухлисон итминон доранд, ки муҳимтарин лаҳзаҳо ҳанӯз пешанд.
Ҷадвали бозии минбаъда
- 1 октябр: «Истиқлол» – «Гоа».\
- 22 октябр: «Истиқлол» – «Ал-Завроа».
- 5 ноябр: «Ал-Завроа» – «Истиқлол».
- 26 ноябр: «Истиқлол» – «Ан-Наср» дар Душанбе (мухлисон интизори Роналду ҳастанд).
- 24 декабр: «Гоа» – «Истиклол».
Шикасти вазнин дар Эр-Риёз ногувор буд, вале роҳро ба пеш намебандад. Барои «Истиқлол» муҳим аст, ки ба бозиҳои хонагӣ такя кунад ва аз дастгирии мухлисон истифода барад.
Ҳар як имтиёз дар гурӯҳи D арзиши хос дорад. Барои бозигарон бошад, ин имкониятест, ки нишон диҳанд: футболи тоҷик метавонад дар сатҳи беҳтарин дастаҳои қора рақобат кунад.
АКС: АФК