Душанбе, 30 декабр, 2025 – АИ «Корвон Иттилоот». Дар мақоми Ваколатдор оид ба ҳуқуқи инсон дар Ҷумҳурии Тоҷикистон ҷаласаи навбатии Шӯрои ҳамоҳангсозии байниидоравӣ оид ба татбиқи «Барномаи омӯзиш дар соҳаи ҳуқуқи инсон барои солҳои 2022–2026» баргузор гардид. Дар ҷаласа фаъолияти мақомоти давлатӣ ва идораҳо вобаста ба иҷрои барнома дар соли 2025 ҷамъбаст шуда, самтҳои минбаъдаи ҳамкории байниидоравӣ муайян гардиданд.

Тибқи иттилои хадамоти матбуоти Ваколатдор оид ба ҳуқуқи инсон, таваҷҷуҳи асосӣ ба арзёбии натиҷаҳои амалии барнома равона шуд, ки ҳадафи он ташаккули низоми устувори маърифати ҳуқуқӣ ва баланд бардоштани сатҳи фарҳанги ҳуқуқии аҳолӣ мебошад.

Ваколатдор оид ба ҳуқуқи инсон дар Ҷумҳурии Тоҷикистон, раиси Шӯро Умед Бобозода таъкид намуд, ки тайи чор соли охир барнома дар ҳамкории зичи сохторҳои давлатӣ ва шарикон амалӣ гардида, ба таҳкими ниҳодҳои миллӣ оид ба ҳифзи ҳуқуқи инсон, тарғиби ҳуқуқи инсон ва таҳияи адабиёти ҳуқуқӣ мусоидат мекунад.

Барнома хусусияти фарогир дошта, доираи васеи гурӯҳҳои ҳадафро дар бар мегирад. Он омӯзиши ҳуқуқи инсонро дар низоми маориф, гузаронидани курсҳои таълимӣ ва бозомӯзии омӯзгорон, судяҳо, хизматчиёни давлатии шаҳрвандӣ, кормандони мақомоти ҳифзи ҳуқуқ ва хизматчиёни ҳарбиро фаро мегирад.

Бо назардошти ҳадафҳои марҳилаи чоруми Барномаи ҷаҳонии маориф дар соҳаи ҳуқуқи инсон, ҷавонон ва намояндагони васоити ахбори омма низ ба гурӯҳҳои мақсаднок шомил гардидаанд.

Ҳамзамон, ҷанбаи байналмилалии фаъолияти анҷомёфта низ таъкид гардид. Эълон гардидани соли 2027 аз ҷониби Маҷмааи Умумии Созмони Милали Муттаҳид ҳамчун Соли байналмилалии маърифати ҳуқуқӣ далели муҳим будани роҳбурд ва ташаббусҳои Ҳукумати Ҷумҳурии Тоҷикистон дар соҳаи ҳуқуқи инсон арзёбӣ шуд.

Иштирокчиёни ҷаласа зикр намуданд, ки татбиқи барнома аз мавҷудияти тамоми имкониятҳои зарурӣ барои омӯзиши низомманд дар соҳаи ҳуқуқи инсон дар кишвар шаҳодат медиҳад.

Шӯрои ҳамоҳангсозии байниидоравӣ бо қарори Ҳукумати Ҷумҳурии Тоҷикистон аз 30 декабри соли 2021 таъсис ёфта, намояндагони Суди Олӣ, Прокуратураи генералӣ, вазорату идораҳои соҳавӣ, мақомоти ҳифзи ҳуқуқ, сохторҳои маориф ва илм, инчунин Донишгоҳи миллии Тоҷикистон ва Академияи воситаҳои ахбори оммаро муттаҳид менамояд. Чунин таркиб равиши байнисоҳавии давлатро дар масъалаҳои маърифати ҳуқуқӣ ва ҳифзи ҳуқуқи инсон инъикос мекунад.

ФОТО: Пресс-служба Уполномоченного по правам человека в Республике Таджикистан.