Душанбе, 04 феврал, – АИ «Корвон Иттилоот». Рӯзи 2 феврали соли 2026 дар пойтахти Ҷумҳурии Тоҷикистон омӯзиши минтақавии амалӣ оид ба таҳкими иқтидори кишварҳои Осиёи Марказӣ дар самти таҳияи инвентаризатсияи газҳои гулхонаӣ ва арзёбии таъсири сиёсати иқлимӣ дар бахши истифодаи замин, тағйирёбии истифодаи замин ва хоҷагии ҷангал (LULUCF) оғоз гардид.
Омӯзиш то 5 феврал идома ёфта, намояндагони ниҳодҳои дахлдор ва коршиносони миллиро аз Қазоқистон, Қирғизистон, Тоҷикистон, Туркманистон ва Ӯзбекистон муттаҳид намудааст.
Чорабинӣ дар доираи лоиҳаи Regional Climate Action Transparency Hub for Central Asia (ReCATH) баргузор шуда, онро Маркази минтақавии экологии Осиёи Марказӣ (CAREC) бо дастгирии Initiative for Climate Action Transparency (ICAT) ва бо мусоидати техникии Greenhouse Gas Management Institute (GHGMI) амалӣ менамояд.
Ин омӯзиш идомаи мантиқии барномаи минтақавӣ оид ба методологияи инвентаризатсия ва асосҳои арзёбии сиёсат ва тадбирҳо дар бахши LULUCF мебошад, ки моҳи октябри соли 2025 дар шаҳри Бишкек баргузор гардида буд. Марҳилаи нав ба такмили малакаҳои амалӣ ва истифодаи мустақими маълумот равона шудааст.
Ҳадафи асосии чорабинӣ таҳкими минбаъдаи иқтидори коршиносони миллӣ дар таҳияи инвентаризатсияҳои партовҳо ва фурӯбарии газҳои гулхонаӣ, инчунин арзёбии таъсири сиёсат ва тадбирҳо (PaMs) дар бахши истифодаи замин ва хоҷагии ҷангал мебошад.
Дар ҷараёни омӯзиш иштирокчиён ба арзёбии партовҳо ва фурӯбарии газҳои гулхонаӣ, таҳлили сиёсати миллӣ, беҳтар намудани сифати маълумот ва равишҳои методологӣ дар инвентаризатсияҳо машғул мешаванд.
Барномаи омӯзиш машғулиятҳои техникӣ, корҳои амалӣ бо истифода аз асбоби EX-ACT, муаррифии кишварҳо ва муҳокимаи масъалаҳои асосии техникӣ, аз ҷумла мониторинги истифодаи замин, ҳисоботи карбон дар хок ва биомасса, инчунин ба инобат гирифтани дарахтон дар маҳалҳои аҳолинишин ва зироатҳои бисёрсоларо дар бар мегирад. Табодули таҷриба байни кишварҳо ҷузъи муҳими барнома маҳсуб меёбад.
Ба таъкиди ташкилкунандагон, чунин омӯзишҳо ба баланд бардоштани сифати инвентаризатсияҳои миллии газҳои гулхонаӣ, таҳкими ҳамкории минтақавӣ ва ташаккули ҷомеаи устувори коршиносон мусоидат менамоянд. Ин иқдомҳо ба кишварҳои Осиёи Марказӣ дар иҷрои уҳдадориҳояшон дар доираи Созишномаи Париж ва Чаҳорчӯби такмилёфтаи шаффофият (Enhanced Transparency Framework, ETF) кумак мерасонанд.
АКС: https://carececo.org/