Душанбе, 13 декабр, 2025г. – АИ «Корвон Иттилоот». Дар Маҷлиси намояндагони Маҷлиси Олии Ҷумҳурии Тоҷикистон 10 декабр  ҳамоиши муҳим баргузор шуд, ки ба заминаҳои ҳуқуқии гузариш ба иқтисоди рақамӣ бахшида шудааст. Форум таҳти унвони «Парламент ва рушди инноватсия: асосҳои қонунии гузариш ба иқтисоди рақамӣ» ба яке аз муҳимтарин минбарҳо барои баррасии масоили рушди рақамисозӣ табдил ёфт.

Ҳамоиш таҳти роҳбарии муовини Раиси Маҷлиси намояндагон Азиз Гиёзода доир гардид ва дар доираи татбиқи Стратегияи рушди инноватсия ва иқтисоди рақамӣ барои солҳои 2025–2030 баргузор шуд.

Азиз Гиёзода зимни суханронии худ таъкид кард, ки иқтисоди рақамӣ имрӯз ба яке аз омилҳои асосии рушди ҷаҳонӣ табдил ёфтааст. Пешгӯиҳо нишон медиҳанд, ки то соли 2030 ҳиссаи технологияҳои рақамӣ дар иқтисоди ҷаҳон аз 60 фоиз бештар хоҳад шуд. Дар чунин шароит Тоҷикистон бояд заминаи ҳуқуқии муосир ва инфрасохтори техникии мувофиқро таҳким бахшад.

Дар ҷараёни баррасӣ масъалаҳои зерин ҳамчун самтҳои афзалиятнок муайян шуданд:

• такмили қонунгузорӣ бо дарназардошти талаботи нави технологӣ,
• таҳкими инфрасохтори рақамӣ дар сатҳи ҷумҳурӣ,
• омодасозии мутахассисони баландихтисос,
• ҷалби сармоягузорӣ барои рушди лоиҳаҳои инноватсионӣ.

Таъкид гардид, ки рақамисозӣ танҳо ворид намудани технологияҳои нав нест, балки равандест, ки ислоҳоти амиқи институтсионалӣ ва ҳамоҳангии сохторҳои давлатӣ талаб мекунад.

Раиси Кумитаи Маҷлиси намояндагон оид ба энергетика, саноат, сохтмон ва коммуникатсия Муҳаммадулло Шерализода зикр кард, ки нақши Парламент дар ташаккули муҳити ҳуқуқии мусоид барои инноватсия басо муҳим мебошад. Муовофиқати меъёрҳои қонунгузорӣ бо талаботи замони рақамӣ шарти асосии пешбурди иқтисоди рақамӣ ба шумор меравад.

Ба гуфтаи ӯ, гузариш ба иқтисоди рақамӣ раванди мураккабест, ки ҳамзамон рушду танзими меъёрҳои ҳуқуқӣ, инфрасохтори техникӣ ва иқтидори кадриро талаб мекунад.

Форуми мазкур заминаи муҳими ташкили ташаббусҳои нави қонунгузорӣ ва таҳкими нақши Парламент дар пешбурди инноватсионӣ дар кишвар гардид.

АКС: Маҷлиси намояндагони Маҷлиси Олии Ҷумҳурии Тоҷикистон