Душанбе, 16 феврал, – АИ «Корвон Иттилоот». Аз 5 феврали соли 2026 дар Ҷумҳурии Тоҷикистон фаъолияти интернети моҳвораии Starlink расман оғоз гардид. Дар ин бора аз Хадамоти алоқаи назди Ҳукумати Ҷумҳурии Тоҷикистон хабар доданд.

Ин иқдом марҳилаи муҳими раванди табдили рақамии кишвар ва густариши дастрасӣ ба хизматрасониҳои муосири телекоммуникатсионӣ, бахусус дар минтақаҳои дурдасту кӯҳистон, ба ҳисоб меравад.

Ба иттилои манбаъ, тамоми иҷозатномаҳо, расмиёти техникӣ ва бақайдгирии давлатии таҷҳизоти интернети моҳвораӣ дар ҳудуди кишвар пурра анҷом ёфтаанд. Ин шароити ҳуқуқиро барои истифодаи расмии хизматрасониҳо аз ҷониби шаҳрвандон ва ташкилотҳо фароҳам овард.

Ҳамин тариқ, хизматрасонии Starlink, ки аз ҷониби ширкати SpaceX амалӣ мешавад, акнун дар Тоҷикистон мутобиқи талаботи қонунгузории миллӣ фаъолият мекунад.

Харид ва дарёфти таҷҳизот, инчунин шиносоӣ бо шартҳо ва тарофаҳо мустақиман тавассути сомонаи расмии ширкат — Starlink.com анҷом дода мешавад. Арзиши таҷҳизот ва тарофаҳо аз ҷониби ширкат тибқи сиёсати тиҷоратии он муайян мегарданд.

Истифодабарандагон метавонанд таҷҳизоти худро мустақилона сабти ном ва фаъол намоянд. Ҳангоми сабти ном пешниҳод намудани маълумоти шахсӣ зарур аст, аз ҷумла:

• нусхаи шиноснома (силсила ва рақам),
• рақами мушаххаси андозсупоранда,
• рақами телефон,
• маълумоти корти пардохтӣ бо маблағи кофӣ барои пардохти хизматрасонӣ.

Нисбат ба таҷҳизоте, ки қаблан бе иҷозати расмӣ истифода мешуд, Хадамоти алоқа тавсия медиҳад, ки истифодабарандагон аз тартиби муқарраршудаи сабти ном гузаранд ва фаъолияти таҷҳизотро ба талаботи қонунгузории Ҷумҳурии Тоҷикистон мутобиқ намоянд.

Дар акси ҳол, ширкат метавонад маҳдудият ҷорӣ кунад ё хизматрасониро нисбат ба чунин таҷҳизот қатъ намояд.

Тибқи тартиби муқарраршуда, сабти номи истифодабарандагон ва таҷҳизот аз ҷониби худи ширкат анҷом дода шуда, маълумоти зарурӣ дар доираи талаботи қонунгузорӣ ба мақоми ваколатдор пешниҳод мегардад.

Хадамоти алоқа раванди истифода ва фаъолияти хизматрасониҳоро назорат намуда, дастрасӣ ба маълумоти заруриро бо мақсади назорат ва танзим таъмин мекунад.

Оғози фаъолияти интернети моҳвораӣ имкониятҳои иловагӣ барои рушди иқтисоди рақамӣ, таҳсилоти фосилавӣ, телетиб ва хизматрасониҳои электронии давлатӣ фароҳам меорад. Барои минтақаҳои кӯҳистон ва дурдаст ин хизматрасонӣ аҳамияти хос дорад.

Оғози расмии Starlink дар Тоҷикистон қадами муҳим дар самти ҳамгироии кишвар ба фазои ҷаҳонии рақамӣ ва таҳкими устувории телекоммуникатсионӣ ба шумор меравад.

АКС: Хадамоти алоқаи назди Ҳукумати Ҷумҳурии Тоҷикистон