Президенти Русия Владимир Путин даъватнома барои пайвастан ба Шӯрои сулҳи Ғазза, ки ба наздикӣ бо ташаббуси президенти ИМА Доналд Трамп таъсис ёфтааст, гирифт. Дар ин шӯро инчунин президенти Қазоқистон Қосимҷомарт Тоқаев, сарвазирони Италия ва Маҷористон Ҷорҷио Мелони ва Виктор Орбан, президентҳои Аргентина ва Бразилия Хавьер Майли ва Лула да Силва, сарвазири Канада Марк Карни, президентҳои Туркия ва Миср Раҷаб Тайиб Эрдуғон ва Абдулфаттоҳ ас-Сисӣ ва чанд раҳбари дигари ҷаҳон шомиланд. Тибқи иттилои манбаъҳо, Узбакистон, Маҷористон ва як қатор кишварҳои дигар аллакай даъватномаро қабул кардаанд.

Шӯрои сулҳ масъули назорати стратегии барқарорсозии Ғазза, сафарбар кардани захираҳои байналмилалӣ ва ҳамоҳангсозии рушди осоиштаи минтақа хоҳад буд. Раёсати ин созмонро Доналд Трамп ба ӯҳда дорад, ки рӯзномаи онро муайян мекунад, қарорҳоро тасдиқ мекунад ва метавонад аъзои шӯроро аз ҳайати худ хориҷ кунад. Оинномаи Шӯро муқаррар мекунад, ки аъзоён ба мӯҳлати се сол хидмат мекунанд, аммо саҳми 1 миллиард доллар узвияти муваққатиро ба узвияти доимӣ табдил медиҳад.

Шӯрои сулҳ дар аввал ҳамчун ниҳод барои барқарорсозии баъдиҷангии Ғазза ва назорати маъмурияти технократии ин минтақа ба нақша гирифта шуда буд. Дар назар аст, ки вазифаҳои шӯро барои ҳалли дигар низоъҳо бо истифода аз модели монанд васеъ карда шаванд. Маросими расмии ифтитоҳи он аз 19 то 23 январ дар Форуми иқтисодии ҷаҳонӣ дар Давос баргузор мешавад.

Таъсиси Шӯрои сулҳ ҳамчун механизми алтернативии байналмилалӣ, мустақил аз СММ, ки барои ҳалли босуръат ва "самаранок"-и низоъҳо равона шудааст, баррасӣ мешавад. Коршиносон қайд мекунанд, ки ин сохтор асосан лоиҳаи шахсии Трамп аст ва фишангҳои асосии қудрат дар дасти раис мутамарказ шудаанд.

19 январи соли 2026, соати 16:04:47