Душанбе, 19 декабр, 2025 – АИ «Корвон Иттилоот». Дар Ҷумҳурии Тоҷикистон Барномаи давлатии рушди саноати фармасевтӣ барои солҳои 2026–2030 таҳия хоҳад шуд. Тибқи супориши Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон, Вазорати тандурустӣ ва ҳифзи иҷтимоии аҳолӣ дар ҳамкорӣ бо дигар вазорату идораҳо лоиҳаи ин барномаро омода намуда, ба Ҳукумати кишвар пешниҳод менамояд. Ин нукта дар Паёми Президенти мамлакат ба Маҷлиси Олӣ ироа гардид.
Таҳияи барномаи мазкур ҷузъи ислоҳоти пайгиронае мебошад, ки ба баланд бардоштани сатҳи зиндагии аҳолӣ, таҳкими ҳифзи иҷтимоӣ ва таъмини устувори шаҳрвандон бо маводи доруворӣ равона шудааст.
Дар Паём таъкид гардид, ки таъмини шароити арзандаи зиндагӣ, беҳтар намудани сатҳи некӯаҳволии аҳолӣ ва дастгирии қишрҳои осебпазир аз самтҳои афзалиятноки сиёсати давлатӣ маҳсуб меёбанд. Дар ҳамин замина рушди соҳаи фармасевтӣ на танҳо вазифаи иқтисодӣ, балки унсури муҳими низоми тандурустӣ ва ҳифзи иҷтимоӣ арзёбӣ мешавад.
Сарвари давлат ҳамчунин ба зарурати рафъи мушкилот ва камбудиҳои мавҷуда, инчунин идомаи ислоҳот дар соҳаи иҷтимоӣ таъкид намуд.
Дар Паём ба ҳамоҳангсозии фаъолияти байниидоравӣ таваҷҷуҳи махсус зоҳир гардид. Аз ҷумла, Вазорати тандурустӣ ва ҳифзи иҷтимоии аҳолӣ якҷо бо Вазорати меҳнат, муҳоҷират ва шуғли аҳолӣ ва Агентии суғуртаи иҷтимоӣ ва нафақа вазифадор карда шуданд, ки барои баланд бардоштани самаранокии ҳуҷҷатҳои банақшагирии стратегӣ ва барномаҳои давлатӣ тадбирҳои мушаххас андешанд.
Пешвои миллат таъкид намуданд, ки ҳадаф танҳо таҳияи санадҳо нест, балки ноил шудан ба натиҷаҳои воқеӣ дар манфиати шаҳрвандон мебошад.
Интизор меравад, ки Барномаи давлатии рушди саноати фармасевтӣ барои солҳои 2026–2030 ба навсозии соҳа, рушди истеҳсоли дохилии доруворӣ ва баланд бардоштани дастрасии аҳолӣ ба маводи доруворӣ заминаи устувор фароҳам оварад.
Қадами мазкур аз талоши Тоҷикистон ҷиҳати рушди устувори иҷтимоию иқтисодӣ, коҳиши вобастагӣ аз омилҳои беруна ва таҳкими низоми миллии тандурустӣ дар дурнамои дарозмуддат шаҳодат медиҳад.
АКС: АИ «Корвон Иттилоот».