Душанбе, 16 сентябр, – АИ «Корвон Иттилоот». Лагери тобистонаи «Шоҳин» дар шаҳри Гулистон рӯзҳои 12–14 сентябр ба пойтахти озодию ҳаяҷон табдил ёфт – маҳз дар ин ҷо мотофестивали байналмилалии дӯстии халқҳо ONE RIDE – ONE HEART баргузор гардид.

Ташкилкунандагони чорабинӣ — нахустин клуби мотосиклронзанони Тоҷикистон The Beasts MCC бо дастгирии SRD Tajikistan. Дар фестивал беш аз 300 мотосиклрон аз кишварҳои Осиёи Марказӣ ҷамъ омаданд, то дар фазои озодӣ, суръат ва дӯстии воқеӣ муттаҳид шаванд.

«Мо мехостем нишон диҳем, ки мотосикл — танҳо техника ва суръат нест. Ин воситаи муттаҳидсозии одамон, илҳомбахш ва эҷоди эҳсосоти нав мебошад», — мегӯяд муассисаи The Beasts MCC Фарида Раҳмонова.

Фестивал ба як ҷашни воқеӣ мубаддал шуд. Байкерон мотосиклҳои худро намоиш дода, дар заҳрҳои дастаҷамъона ва мастер-классҳо ширкат варзиданд. Шомгоҳон бошад, дар атрофи оташдони саҳроӣ ҷамъ омада, қиссаҳои сафар ва таҷрибаҳои худ дар роҳҳоро нақл мекарданд.

«Вақте, ки мо дар ин роҳҳо якҷо ҳаракат мекунем, эҳсоси ягонагӣ ба вуҷуд меояд, ки онро бо сухан ифода кардан душвор аст. Ин чизест бузургтар аз як фестивал — ин хонаводаи воқеии байкерон аст», — мегӯяд иштирокчии фестивал аз Қирғизистон Алишер.

Ташкилкунандагон таъкид намуданд, ки ONE RIDE – ONE HEART — ин на танҳо суръат ва драйв, балки рамзи дӯстӣ миёни миллатҳо, ҳамдигарфаҳмӣ ва эҳсосоти муштарак мебошад.

Мотофестивали Гулистон собит сохт, ки роҳҳо метавонанд қалбҳоро муттаҳид созанд, мотосиклҳо бошанд — воситаи эҷоди фазои нодири озодӣ, шодӣ ва ваҳдат гарданд. Иштирокчиён аллакай барои соли оянда нақша мекашанд, аммо хотираҳои шамоли гарми кӯл, овози муҳаррикҳо ва табассумҳои дӯстона бо онҳо то дер мемонад.

АКС: аз манбаъҳои кушода