Душанбе, 24 ноябр, – АИ Корвон Иттилоот. Дар чорчӯби чорабинӣ миёни Бонки Рушди Евразия ва Ҷамъияти Маҳдуди «Фабрикаи каннодии Амири» Ёддошти ҳамкорӣ имзо шуд, ки ба дастгирии рушди иқтидори истеҳсолӣ ва васеъ намудани иқтидори соҳаи хӯрокворӣ дар Ҷумҳурии Тоҷикистон равона шудааст.

Санадро директори генералӣ ҶМ «Фабрикаи каннодии Амири» Ахлиддин Бобомурадов ва муовини раиси Шӯрои директорони Бонки Рушди Евразия Руслан Даленов имзо карданд.

Ҳамкорӣ миёни ЕАБР ва корхонаи «Фабрикаи каннодии Амири» ба рушди истеҳсоли маҳсулоти орд ва шириниҳо равона шудааст. Корхона нақша дорад хатҳои нави истеҳсолиро ба кор андозад ва иқтидори мавҷударо васеъ намояд, ки барои ин сармоягузории дарозмуддат ва дастгирии техникӣ зарур аст.

Таъкид гардид, ки Бонки Рушди Евразия омодааст аз ширкатҳое, ки мехоҳанд самтҳои нави фаъолиятро рушд диҳанд ва ба афзоиши истеҳсолоти кишвар саҳм гузоранд, дастгирӣ намояд. Лоиҳа ба модернизатсияи инфрасохтори истеҳсолӣ ва баланд бардоштани рақобатпазирии истеҳсолкунандагони миллӣ мусоидат хоҳад кард.

Дар доираи Ёддошти ҳамкорӣ тарафҳо якҷоя лоиҳаҳо барои васеъ намудани истеҳсоли маҳсулоти орд ва шириниҳоро коркард хоҳанд кард, стратегияҳои баланд бардоштани самаранокӣ ва сифати маҳсулотро таҳия хоҳанд намуд ва ҷорӣ намудани технологияҳо ва стандартҳои муосирро дастгирӣ хоҳанд кард.

Амалӣ гардидани ташаббусҳо дар доираи Ёддошти ҳамкорӣ имкон медиҳад истеҳсоли маҳсулоти хӯроквории маҳаллиро афзоиш диҳад, ҷойҳои нави корӣ эҷод кунад ва сатҳи шуғли аҳолиро баланд бардорад, худиқтидориро дар соҳаи хӯрокворӣ устувор созад ва рушди саноати коркарди маҳаллӣ ва истеҳсоли маҳаллиро тақвият бахшад.

Ҳузури Бонки Рушди Евразия нақши муҳимро дар дастгирии лоиҳаҳои истеҳсолӣ мебозад, ки ба рушди пойгоҳи истеҳсолии минтақавӣ ва баланд бардоштани ҷалбнокии сармоягузорӣ дар Тоҷикистон равона шудаанд. Бонк ба татбиқи технологияҳои муосир, баланд бардоштани самаранокии корхонаҳо ва васеъ намудани потенсиали содиротии кишвар мусоидат мекунад.

АКС: АМИТ “ХОВАР”