Душанбе, 27 декабр, 2025 – АИ «Корвон Иттилоот». Сафари кории Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон 25 декабр ба вилояти Хатлон, ки аз ноҳияи Ҷайҳун ба ноҳияи Ҷалолиддини Балхӣ идома ёфт, идомаи сиёсати устувори давлатӣ ҷиҳати рушди минтақаҳои аграрӣ ва таҳкими саноати коркард мебошад.

Пояи ояндаи содироти аграрӣ: ташаккули низоми муосири логистикаи маҳсулоти кишоварзӣ

Шиносоӣ бо ноҳия аз муаррифии лоиҳаи сохтмони Маркази агрологистикӣ оғоз гардид. Марказ дар самти ҷамъоварӣ, нигоҳдорӣ, коркард, тарозу, бастабандӣ ва содироти маҳсулоти гуногуни кишоварзӣ фаъолият хоҳад кард. Лоиҳа бунёди бинои асосӣ, анборҳо ва сардхонаҳои муосир, ошхона барои 48 ҷойи нишаст ва дигар иншооти ёрирасонро дар бар мегирад.
Корҳои сохтмонӣ моҳи июни соли ҷорӣ оғоз гардида, анҷоми онҳо ба моҳи ноябри соли 2026 ба нақша гирифта шудааст.

Ба Пешвои миллат иттилоъ дода шуд, ки дар марказ се хатти муосири тарозу ва бастабандӣ фаъол мегардад ва баъди ба истифода додани он 67 нафар бо ҷойи кор таъмин мешаванд, ки 40 нафарашон коргарони мавсимӣ мебошанд. Сарвари давлат оид ба иҷрои саривақтӣ ва босифати корҳои сохтмонӣ дастурҳои мушаххас дод.

Аз ашёи хом то маҳсулоти тайёр: марҳилаи нави таъмини амнияти озуқаворӣ

Яке аз иншооти муҳими саноатӣ корхонаи ордбарории ба номи Маҷид Ҳафизов мебошад, ки аз ҷониби Корпоратсияи «Тоҷвар» бунёд шудааст. Иқтидори истеҳсолии он то 200 тонна коркарди ғалладона дар як шабонарӯз мерасад. Ашёи хом аз Ҷумҳурии Қазоқистон ворид шуда, дар озмоишгоҳи махсус аз санҷиши сифат мегузарад.

Корхона дорои пайвасти роҳи оҳан ва ду анбори муосир бо ғунҷоиши умумии 50 ҳазор тонна мебошад. Дар он 150 мутахассиси маҳаллӣ дар ду баст фаъолият доранд. Истеҳсолот тавассути се хатти автоматикунонидашуда амалӣ гардида, маҳсулот таҳти тамғаи «Балхӣ» асосан ба бозори дохилӣ пешниҳод мешавад. Дар оянда таъсиси сехҳои маҳсулоти нонӣ, хӯроки чорво ва неругоҳи офтобӣ пешбинӣ шудааст.

Воридоти технология — натиҷаи маҳаллӣ: тавсеаи саноати коркард дар ноҳия

Дар идомаи сафар корхонаи истеҳсоли макарон «Руми Паста» пас аз як соли бозсозӣ ва навсозӣ ба истифода дода шуд. Таҷҳизот аз Ҷумҳурии Италия ворид гардида, мутахассисони маҳаллӣ ба фаъолияти истеҳсолӣ ҷалб шудаанд.

Ҳоло дар корхона як хатти технологӣ амал мекунад, ки дар ду баст 20 нафар ба истеҳсол ва бастабандии се навъи маҳсулот машғуланд. 

Бо ба кор андохтани ду хатти нави технологӣ шумораи кормандон то 50 нафар расонида мешавад. Пешвои миллат ба масъулон ҷиҳати истифодаи самараноки иқтидорҳо ва истеҳсоли маҳсулоти мутобиқ ба стандартҳои байналмилалӣ дастур дод.

АКСҲО: Хадамоти матбуоти Президенти Ҷумҳурии Тоҷикистон