Душанбе, 13 сентябр, – АИ «Корвон Иттилоот».  Тими миллии Тоҷикистон ситораи нав гирифт: дарвозабон Рустам Ятимов дар як мавсим дар Лигаи олии Русия (РПЛ) ба яке аз бозингарони барҷастатарин табдил ёфт. Арзиши бозории ӯ ҳафт–ҳашт маротиба афзуд ва худи ӯ ба унвони беҳтарин дарвозабони Ҷоми Русия-2024/25 эътироф шуд.

Ятимов аз чемпионати Тоҷикистон ба РПЛ гузашт ва бо мушкилоти мутобиқшавӣ рӯ ба рӯ гардид. Аммо баъди чанд моҳи бозии мутмаин ӯ ба дарвозабони асосии «Ростов» табдил ёфт ва то анҷоми мавсим ҷойашро ба касе надод.

Аз ноябри соли 2024 то июни соли 2025 Рустам бо бозии устувор ва боэътимодаш эътимоди ҳайати мураббиён ва эҳтироми мухлисонро ба даст овард.

Мураббии маъруфи дарвозабонҳо, узви ҳайати мураббии тими миллии Русия Виталий Кафанов, ки Ятимовро ба «Ростов» оварда буд, рушду комёбии ӯро чунин арзёбӣ намуд: «Ба Рустам осон набуд, вале мутобиқ шуд ва хеле пеш рафт. Ин мавсим дар ёдаш ҳамеша боқӣ мемонад».

Ба гуфтаи Кафанов, таваҷҷуҳ ба Ятимов асоснок аст: дар як мавсим ӯ чанд маротиба беҳтарин бозингари вохӯрӣ гардид, дар моҳи декабри соли 2024 ба унвони бозингари моҳи РПЛ интихоб шуд ва дар Ҷоми Русия мақоми беҳтарин дарвозабон-ро соҳиб гашт.

Имрӯз Рустам Ятимов — гаронбаҳотарин бозингари тими миллии Тоҷикистон ва яке аз арзишмандтарин дарвозабонҳои Осиё ба шумор меравад. Дастовардҳои ӯ нишон доданд, ки футболбозони тоҷик метавонанд худро дар арсаи байналмилалӣ муаррифӣ намоянд.

Парвози касбии Ятимов обрӯи футболи миллиро баланд бардошт ва барои насли ҷавони варзишгарони кишвар намунаи илҳомбахш гардид.

Коршиносон бар онанд, ки агар ӯ суръати рушдашро нигоҳ дорад, Рустамро қуллаҳои нав интизоранд — ҳам дар РПЛ ва ҳам дар арсаи байналмилалӣ. Футболи тоҷик дар симои Ятимов шахсиятеро пайдо кардааст, ки метавонад ба элитаи дарвозабонҳои ҷаҳон дохил шавад.

ФОТО: Федератсияи Футболи Тоҷикистон