Душанбе, 28 феврал, – АИ «Корвон Иттилоот». Тибқи маълумоти охирини Transfermarkt, дарвозабони тоҷик Рустам Ятимов ба рейтинги гаронтарин голкиперҳои Осиё дохил шуда, дар шашумин ҷои рӯйхат бо арзиши 1,80 млн евро қарор гирифт. Ӯ ҳоло ҳам пешсафи ҳамаи дарвозабонҳои Осиёи Марказӣ буда, мақоми худро дар миёни элитаи футболии қораи Осиё тақвият дод.
ТОП-5 дарвозабони Осиё
Дар бистгонаи аввали рейтинги Transfermarkt намояндагони Ҷопон ва лигаҳои Аврупо ҷойгир шудаанд:
- Дзайон Судзуки (Ҷопон, «Парма», 23 сол) — 20,00 млн евро.
- Лео Кокубо (Ҷопон, «Сент-Трюйден», 25 сол) — 4,00 млн евро.
- Ёхэй Такаока (Ҷопон, «Ванкувер Уайткэпс», 29 сол) — 3,50 млн евро.
- Эмиль Аудеро (Индонезия/Италия, «Кремонезе», 29 сол) — 3,20 млн евро.
- Кэйсукэ Осако (Ҷопон, «Санфречче Хиросима», 26 сол) ва Мэттью Райан (Австралия, «Леванте», 33 сол) — ҳарду 2,00 млн евро.
Ятимов миёни пешсафон
Дар шашумин ҷои рӯйхат Рустам Ятимов (Тоҷикистон/Россия, «Ростов», 27 сол) — 1,80 млн евро ҷойгир аст. Дар зинаҳои баъдӣ Томоки Хаякава (Ҷопон, «Касима Антлерс»), узбекистонӣ Абдувоҳид Нематов («Насаф Карши») ва дигар дарвозабонҳои пешқадам бо арзиши 1,50 то 1,00 млн евро қарор доранд.
Ҳаёти футболи ва дастовардҳои Ятимов
Рустам Боборахимович Ятимов 13 июли 1998 дар Нижний Новгород таваллуд шудааст. Роҳи футболиашро дар мактаби «Волга-СДЮСШОР-8» оғоз кард. Пас аз банкрутии «Волга» ба «Истиклол» гузашт, ки дар он ҷо шаш бор қаҳрамони Тоҷикистон ва чор бор ғолиби Ҷоми ва Суперҷоми кишвар шуд. Дар моҳи июни 2024 ба «Ростов» гузашт ва дебюташро дар РПЛ 20 июли 2024 дар бозӣ бо ЦСКА анҷом дод. Муҳлати шартнома то 30 июни 2029 мебошад.
Барои дастаи миллии Тоҷикистон дебюташро 7 июни 2019 дар бозӣ бо Афғонистон баргузор намуд. То декабри 2025 40 бозии расмӣ барои дастаи миллии кишвар анҷом додааст. Дар соли 2022 ба унвони «Дарвозабони сол дар Тоҷикистон», соли 2023 — «Беҳтарин футболбози Тоҷикистон» шинохта шуд. Дар соли 2025 ба унвони беҳтарин дарвозабон ва беҳтарин бозигари Ҷоми Русия даст ёфт — дастоварди таърихӣ барои футболи тоҷик.
Бо арзиши 1,80 млн евро Ятимов мақоми гаронтарин дарвозабони Осиёи Марказиро соҳиб шуд ва номи худро дар миёни элитаи футболии қораи Осиё мустаҳкам кард.
АКС: КФ «Ростов»